Հայկական էներգետիկական ակադեմիայի հիմնադիր նախագահ, ակադեմիկոս, «Ազգ»ի երկարամյա աշխատակից Ստեփան Պապիկյանը տարիներ շարունակ մեծ ծավալի աշխատանքների է կատարում սահմանամերձ գյուղերում գրադարաններ հիմնելու եւ գրադարանային ֆոնդերը համալրելու համար: Մասնավորապես` ՀՀ Արմավիրի մարզի Բագարան սահմանամերձ դպրոց, Մայր Աթոռ սուրբ Էջմիածնի հանրակրթական դպրոց եւ այլն: Այս անգամ բազմաթիվ գրքեր` հանրագիտարաններ,գեղարվեստական եւ այլ բնույթի գրքեր նվիրվեցին «Վաղարշապատի Մ.Գորկու անվան 5 ավագ դպրոց» ՊՈԱԿ-ի գրադարանին:
Ստեփան Պապիկյանը «Վաղարշապատի Մ.Գորկու անվան 5 ավագ դպրոց» ՊՈԱԿ–ում
Հարկ է նշել,որ դպրոցում սովորում են 450 աշակերտ: Այն վերանորոգված է, ունի ջեռուցման համակարգ: Ուսուցիչների եւ աշակերտների համար ստեղծված են հիանալի պայմաններ լավ գիտելիքներ ստանալու համար:Աշակերտները կրում են դպրոցական համազգեստ:
Դպրոցի բակում կառուցվել է հաշարձան-կոթող: Այն նվիրված է Արցախյան պատերազմում զոհված դպրոցի շրջանավարտներին, որոնք հայրենիքի համար զոհվեցին եւ անմահացան: Նրանց հիշատակը միշտ վառ կմնա մեր սրտերում: Դպրոցի հարակից տարածքում նաեւ աշակերտների ուժերով տնկվել են ծառեր եւ թփեր: Տնօրեն Գ.Սաֆարյանը եւ ուսուցիչները մեծ ծավալի աշխատանքներ են կատարում աշակերտներին հայրենասիրական ոգով դաստիարակելու համար:
«Վաղարշապատի Մ.Գորկու անվան 5 ավագ դպրոց» ՊՈԱԿ-ի ղեկավարությունը շնորհակալություն է հայտնում ակադեմիկոս, Ռուսաստանի բնագիտության Ակադեմիայի պրոֆեսոր Ստեփան Պապիկյանին ավելի 50 գիրք դպրոցի գրադարանին նվիրելու համար»,- կարդում ենք տնօրեն Գ.Սաֆարյանի պատասխան նամակում:
Անհրաժեշտ է նշել, որ առաջիկայում Ս.Պապիկյանը կայցելի նաեւ ՀՀ Սյունիքի մարզ` Սիսիանի համայնքային եւ Շենաթաղ գյուղի գրադարանները համալրելու համար:
