Նախորդ տարի՝ թատրոնի միջազգային օրը, Փաշինյանի կաբինետը շնորհավորանքից առաջ աչքալուսանք էր տվել «Գոյ» թատրոնի ստեղծագործական անձնակազմին՝ շրջանառելով Արմեն Մազմանյանի Բեմարվեստի ազգային կենտրոնը Սունդուկյանի անվան Մայր թատրոնի հետ միավորելու նախագիծ: Թեեւ մինչեւ այս պահ (ընդուպ Ազգային ժողով-կառավարություն երեկվա՝ հունվարի 17-ի հարցուպատասխանը) գործադիրն ու ԿԳՄՍ նախարար Ժաննա Անդրեասյանը պնդում են՝ միավորումը լուծարում չի նշանակում, թատրոնի դերասաններն ու գեղարվեստական ղեկավարն, իրենց իսկ բնորոշմամբ, «չինովնիկների կտերը չեն ուտում»:
«Այնքան գեղեցիկ փաթեթավորմամբ են ամեն ինչ ներկայացնում, որ քիչ է մնում՝ հավատանք նրանց կեղծ խոստումներին»,- «Ազգ»-ի հետ զրույցում ասում է թատրոնի դերասան Էլիզա Մանթաշյանը: 2006-ից «Գոյ»-ում աշխատող Մանթաշյանն ապշած է՝ ինչպե՞ս կարելի է թատրոնի բախտի վրա քար գցել՝ գեթ մեկ անգամ չգալ ու սեփական աչքով չտեսնելով, թե ի՞նչ են խաղում եւ մատուցում էքսպերիմենտի թատրոնի բեմում:
«Ո՛չ Ժաննա Անդրեասյանը, ո՛չ փոխնախարարները չեն եկել, չեն տեսել, թե ինչ ասել է փորձարարական թատրոն: Մենք ենք անձնակազմով մի քանի անգամ նախաձեռնել եւ հանդիպել երկու տարբեր փոխնախարարների հետ, եւ կարող եմ վստահ ասել՝ նրանք չեն հասկանում՝ ի՞նչ ասել է թատրոն: Մտածում են՝ գործարան է, որտեղ կոնֆետի թուղթ են արտադրում ու փաթեթավորում կոնֆետը»,- ասում է մեր զրուցակիցը, որ վստահ է՝ պաշտոնյաները հստակ ցուցում ունեն՝ էքսպերիմենտի թատրոնը լուծարել՝առանց ավելորդ աղմուկի:
Իրական փաթեթավորողը, ըստ դերասանի, նախարարությունն է, որն փորձում է լուծարումը որպես ինքնավարության դրսեւորում ներկայացնել: Բայց բոլոր «Գոյ»-ականներն են վստահ՝ Մայր թատրոնի կազմում անհետանալու է ոչ միայն նմանը չունեցող ձեռագիրը, այլեւ թատրոնն առհասարակ. «Մեզ՝ որպես գետ, փորձում են միացնել մեծ ծովի, բայց այդ ծովի մեջ մենք երբեք չենք երեւալու, այնպես՝ ինչպես Կուր գետի մեջ թափվող Դեբեդը չի երեւում»:
«Գոյ»-ը Սունդուկյանին միավորելու գործընթացքում դերասաններն ու գեղարվեստական ղեկավարը քաղաքական ենթատեքստ են տեսնում: Վստահ են՝ սա նախկին փոխնախարար Արա Խզմալյանի եւ Սունդուկյան թատրոնի տնօրեն Վարդան Մկրտչյանի ձեռքի գործն է: Չեն բացառում նաեւ, որ նախարարության՝ թատրոնից «վրեժխնդրությունը» կապված է «Գարեգին Նժդեհ» ներկայացման հետ:
ՍԵՎԱԿ ՎԱՐԴՈՒՄՅԱՆ
