Բարձրագույն դատական խորհուրդը, որի նախագահն արդարադատության նախարար եղած ժամանակ հաճախ էր նայում Փաշինյանի՝ իր գլխավերեւում կախված նկարին, հաղորդագրութուն է տարածել, թե «կիրառվող արդյունավետ պրակտիկայի շնորհիվ»՝ դատարանները որպես խափանման մեթոդ՝ կալանքն սկսել են ավելի քիչ կիրառել:
Դեպարտամենտն ուսումնասիրել է մինչեւ 2022-ի հուլիսը, այսինքն` մինչեւ Քրեական դատավարության օրենսգրքի փոփոխությունների ուժի մեջ մտնելը եւ դրանից հետո եղած գործերն ու պարզել՝ կալանքի դեպքերը նվազել են 5.6 %:
Ոչ ոք չի քննարկում կամ քննադատում, որ դատարանը մեղադրյալին միանգամից չի կալանավորում, բայց բոլորին էլ պարզ է, որ դա, նախեւառաջ, բյուջե հավելյալ մուտքեր ապահովելու միջոց է: Գրավի դիմաց ազատության մեջ թողնելու գումարը ոչ թե մի քանի հազար, այլ մի քանի տասը հազար դոլարի է հասնում, իսկ դա, անխոս, ոչ բոլորին է հասանելի:
Ի դեպ, թիվ-թվաբանություն ներկայացնող ու դրանք գեղեցիկ փաթեթավորմամբ մատուցող ԲԴԽ-ն մոտ մեկ ամիս առաջ ռեպորտաժ էր նկարել այն մասին, թե ինչու են ձգձգվում քաղաքական աստառ ունեցող գործերը, օրինակ, «Մարտի մեկը»: Անդրեասյանի ղեկավարած կառույցը փնթենթում էր դատավորների վարքագծից ու նրանց անուղղակիորեն մեղադրում «հասարակությանը հուզող գործերը» միտումնավոր տապալման տանելու մեջ:
ՍԵՎԱԿ ՎԱՐԴՈՒՄՅԱՆ
