Ծխողները մի քանի օրից նոր սահմանափակումների հետ կբախվեն՝ զրկվելով սրճարաններում մի գավաթ սուրճը մի գլանակ ծխախոտի հետ «վայելելուց»: Գործադիրն է որոշել՝ 2022-ի մարտի 15-ից արգելել ծխախոտային արտադրատեսակների ու դրանց փոխարինիչների օգտագործումը հանրային սննդի բոլոր օբյեկտներում: Ի դեպ, ծխելու արգելքը տարածվում է հանրային օբյեկտների թե՛ փակ, թե՛ բացօթյա տարածքների վրա:
Ինչպես գրեթե բոլոր օրենսդրական նախաձեռնություններում ու որոշումներում՝ իշխանությունը դրա հիմնավորման, կարգավորումների ու կիրառման գործիքակազմի ներկայացումների մեջ աչքի է ընկնում տրամաբանությունից զուրկ մեխանիզմներ երեւան բերելով: Փաշինյանի իշխանությունն արգելում է բացօթյա տարածքում ծխելը, փոխարենն անարգել ծխելու հաճույքը թողնում քայելելով ծխողների համար: Այսինքն՝ եթե ծխող եք, ապա փողոցում միայն շարժման մեջ գտնվելով կարող եք ծխել, այլապես եթե համարձակվեք մի պահ կանգնել ու, օրինակ, հեռախոսով ինչ-որ բան նայել, ապա բացառված չէ, որ պարեկային ծառայություն իրականացնող ոստիկանները կարող են ձեզ տուգանել ծխելու կանոնները խախտելու համար:
Ինքս, օրինակ, կողմ եմ հանրային բոլոր վայրերում ծխելն արգելելուն կամ ծխողների համար հատուկ սրահներ առանձնացնելուն: Բայց որեւէ կերպ հասկանալ ու ընկալել չեմ կարող Փաշինյանի իշխանության կողմից ներկայացված վերոնշյալ փնթի նախագիծը, որն ասես մշակվել է տրամաբանությունից զուրկ գործիքակազմեր առաջարկող որեւէ մի կենտրոնում:
ՍԵՎԱԿ ՎԱՐԴՈՒՄՅԱՆ
