Շվեդիայում մեկնարկել է «Ամառվա տերերը» ծրագիրը, որի շրջանակներում տարբեր մասնագիտությունների տեր անձինք խոսում են իրենց անձնական փորձառությունների մասին: Այս տարվա խոսակցության թեման է՝ «Ես կպատմեմ, թե ինչպես ստացա կյանքիս բերկրանքը»: Օգոստոսի 16-ին հանդես կգա շվեդաբնակ նկարչուհի, ռուսական «Փուսի ռայըթ» («Հեշտոցի ապստամբություն») ֆեմինիստական փանք ռոք խմբի անդամ Լուսինե Ջանյանը: «Ես կխոսեմ «Փուսի ռայըթի» մասին,- ասում է Լուսինեն,- այն մասին, թե ինչպես մենք՝ արվեստագետներս, պայքարեցինք Պուտինի դեմ եւ ինչպես նա կործանեց գեղարվեստական կյանքը երկրում: Ուզում եմ ընդգծել, որ պատերազմը շարունակվում է արդեն ութ տարի, եւ մենք փորձում էինք զգուշացնել դրա դեմ: Ապա ուզում եմ խոսել նաեւ Ադրբեջանից Ռուսաստան, իսկ հետո՝ Շվեդիա փախչելու իմ փորձի մասին: Երգացանկում ուզում եմ ներառել ե՛ւ ռուսական, ե՛ւ ուկրաինական երգեր, նաեւ հայկական երաժշտություն, երբ խոսում եմ իմ արմատների մասին»:
Ռուսաստանի նկարիչների ստեղծագործական միության եւ Նկարիչների միջազգային դաշնության անդամ Լուսինե Ջանյանը ծնվել է 1981-ին, հայկական պատմական Գանձակ քաղաքում (այժմ՝ Գյանջա, Ադրբեջանում): 1995-ին ընտանիքի հետ տեղափոխվել է Ռուսաստան: 1998-2004 թվականներին սովորել է Կրասնոդարի մշակույթի եւ արվեստի պետական համալսարանի գեղարվեստական եւ արդյունաբերական ակադեմիայում, դեկորատիվ արվեստի դիզայնի եւ զգեստների ձեւավորման բաժիններում, որտեղ հետագայում դասավանդել է: 2004-2013 թվականներին ղեկավարել է «Լուսինե Ջանյանի արվեստանոցը», որի բազմաթիվ սաներ դարձել են երիտասարդ դիզայներների միջազգային մրցույթների հաղթողներ: 2011 թվականին ավարտել է Մոսկվայի Ժամանակակից արվեստի թանգարանի «Ազատ սեմինարներ» դպրոցը: 2013 թվականին Կրասնոդարի մշակույթի եւ արվեստի համալսարանը դադարեցրել է պայմանագիրը նկարչուհու հետ եւ հեռացրել նրան աշխատանքից՝ իբրեւ թե գիտամանկավարժական աշխատողի պաշտոնին մրցույթով ընտրված չլինելու համար, սակայն Ջանյանը կարծում է, որ իր պաշտոնանկությունը եղել է քաղաքական դրդապատճառներով: այն բանից հետո, երբ 2017 թվականի հունվարին Լուսինե Ջանյանի ամուսինը՝ նկարիչ Ալեքսեյ Կնեդլյակովսկին 15 օր կալանավորվել է «Նոր չեկիստ» ակցիայի համար, Շվեդիայի իշխանություններին խնդրել են իրենց քաղաքական ապաստան տրամադրել:
Ա. Բ.
