Գերմանական հեռուստատեսության առաջին ալիքի՝ ARD-ի «Օրվա համայնապատկեր» լրատվականի Թել Ավիվի թղթակիցը փետրվարի 9-ին փոխանցում է, թե Ուկրաինայի գերագույն ռաբբի Ազմանի՝ տեղի 400 000 հաշվվող հրեական համայնքի պաշտպանության հարցում Իսրայելին ուղղված խնդրանքը դժվար կացության է մատնել Իսրայելի կառավարությանը, որ չի ուզում բարկացնել ո՛չ Ռուսաստանին, ո՛չ ԱՄՆ-ին։ «Հում հավկիթն ինչպես ենք զգույշ պահում, որ չկոտրվի,այդպես էլ ռուս-ուկրաինական ճգնաժամի հարցում Իսրայելի պահվածքն է», պատկերավոր բնութագրում է լրագրող Բեթթինա Մայերը։ Իսրայելը որեւէ կողմի պաշտպան չի ուզում լինել, իսկ Ուկրաինային զենքի մատակար լինելու հանգամանքը բացառել է։ «Երբ Իսրայելում պատերազմ է, մենք, բնական է, Իսրայելի կողմնակիցն ենք, սատարում ենք մեր երկրին։ Այժմ Իսրայելի համար դյուրին չէ մեզ նեցուկ լինել, բայց մենք նրա օգնության կարիքն ունենք», նշել է ռաբբին՝ ակնարկելով Ուկրաինայում ապրող հրեաների հանդեպ Իսրայելի պատասխանատվությունը։ 400 000 հրեաներից մոտ 200 000-ը քաղաքացիության իրավունք ունի՝ Իսրայելի վերադարձի օրենքի համաձայն։ Լրատվությունը ներկայացնում է, թե Իսրայելի կառավարությունը պատրաստվում է հազարավոր հրեաների տարհանել ռուս-ուկրաինական ճգնաժամային գոտուց։ «Իմ աշխատանքի մի մասն աշխարհում հրեաների հանդեպ հոգատարությունն է։ Դա նաեւ կառավարության անելիքն է», ասել է Իսրայելի արտգործնախարար Յաիր Լապիդը։ Իսրայելը շատ չի բարձրաձայնում խնդրո առարկա հակամարտության վերաբերյալ իր դիրքորոշման մասին, իսկ հնարավոր պատճառներից մեկը, ըստ ARD-ի, կարող է լինել Ռուսաստանի ներկայությունը Սիրիայում, որ զսպում է Իրանի ազդեցությունը, ինչը նպաստավոր է Իսրայելի համար։ «Ռուսաստանը շարունակում է ցուցադրել իր ուժը նաեւ Իսրայելի նկատմամբ։ Բայց՝ զգույշ է եւ չի հատում որոշակի սահման, քանզի հարգում է Մերձավոր Արեւելքում Իսրայելի ազդեցությունը», գերմանական հեռուստատեսությունը փոխանցում է ՌԴ- ում եւ Ուկրաինայում Իսրայելի նախկին դեսպան Մագենի կարծիքը։
Լավ կլիներ, որ Հայաստանի կառավարությունն ուշադիր հետեւեր Իսրայելի օրինակին, հատկապես այն հանգամանքին, թե ինչպես է վարվում իր սահմաններից դուրս գտնվող իր հայրենակից, ազգակիցների հետ։
