Անցյալ հոկտեմբերի 27-ին, Բեռլինում, 99 տարեկան հասակում վախճանվել է գերմանական թատրոնի հայազգի դերասան, բեմադրիչ, լրագրող, թարգմանիչ եւ արձակագիր Գրիգոր Առաքել Իմանուել Մելիքյանը: Ծնվել է Գերմանիայի Բիլեֆելդ քաղաքում, տիգրանակերտցի հոր (Գրիգոր Մելիքյան) եւ գերմանուհի մոր ընտանիքում: Նախնական կրթությունն ստացել է ծննդավայրում, 1942-ին հաճախել է Լունիբուրգի մանկավարժական դպրոցը: Երկու տարի ուսանել է Դյուսելդորֆի պետական թատրոնի բարձրագույն դպրոցում՝ աշակերտելով նշանավոր դերասան Գյուստավ Գրյունթքեին: Առաջին անգամ բեմ է բարձրացել 1949-ին՝ Էդինբուրգի թատերական փառատոնում: 1959-ին կարճ ժամանակով աշխատել է Փարիզի Ազգային թատրոնում, 1957-1960 թթ.՝ Շվեյցարիայում, ներկայացրել նաեւ Վիլյամ Սարոյանի պիեսներից: Եղել է նաեւ Բեռնի ռադիոկայանի ազատ աշխատակից, հոդվածներ գրել հայ թատրոնի, պատմության եւ մշակույթի մասին: 1967-ին հաստատվել է Արեւմտյան Բեռլինում, հաճախել Ազատ համալսարանի դասընթացներին, հիմնադրել «Շթուդիո Դիայգնես» թատերախումբը: 30 տարուց ավելի աշխատել է Բեռլինի «Շիլլեր» թատրոնում, մասնակցել Մայակովսկու «Փայտոջիլ», Հոխվերթերի «Փախստականը», ֆոն Քլայսթի «Փշրված կուժը» եւ այլ պիեսների: Նկարահանվել է մեծ եւ փոքր էկրանների մոտ 40 ֆիլմերում՝ «Շթալնեց. մեկ մեռածն ավել է», «Բենիամին Բլյումխեն», «Սիեռա-Լեոնե», «Արնախումները Հավանայում», «Ռավիոլի», «Միսիս Հարիսը մեկնում է Մոնտե Կառլո», «Կեցցե՜ այն, ինչ զորացնում է», «Խենթության խոլորձներ», «Կաբուչեւսկին տանուլ է տալիս» եւ այլն: Հանդես է եկել նաեւ որպես ձայնագրող դերասան: Հրատարակել է «Գիտե՞ք այս երկիրը» (1990), «Այն ժամանակ, մի ճամպրուկ եւ այլ պատմություններ» (2005) ու այլ գրքեր:
Մելիքյանը գերմաներենից զատ տիրապետել է անգլերեն, ֆրանսերեն եւ իտալերեն լեզուներին, իսկ հայերեն սովորել է հասուն տարիքում: Ընտրվել է Բեռլինի Հայ գաղութի վարչության անդամ: 2015 թվականին գերմանաթուրք բեմադրիչ Ֆաթիհ Աքինի հետ վերջինիս «Սպին» կինոնկարի ցուցադրման առթիվ եղել է Վիսբադենի «Կալիգարի» կինոթատրոնում կայացած «Ֆոկուս Արմենիա» միջոցառման պատվավոր հյուր:
Ա. Բ.
