Այդ մասին դեկտեմբերի 7-ին տեղեկացրել է Կ. Պոլսո «Ակօս» շաբաթաթերթը: Ենթադրվում է, որ դատարանը վերստին կքննարկի «Սանասարյան» հիմնադրամին պատկանող անշարժ գույքը պետական գանձարան փոխանցելու դատական վճիռը: Մինչ «Ակօս»-ի հրապարակմանն անդրադառնալը ասենք, որ «Սանասարյան» իջեւանատունը գտնվում է Ստամբուլի կենտրոնի «Սիրքեջի» թաղամասում եւ երկար ժամանակ ծառայել է համանուն հիմնադրամին, որպես կենտրոնական վարչության շենք:
«Սանասարյան» հիմնադրամը, ըստ «Ակօս»-ի, դեռեւս 1901 թ. ստեղծել է էրզրումցի մեծահարուստ վաճառական Աղա Մկրտիչ Սանասարյանը՝ հոգալու համար Էրզրումի Սանասարյան վարժարանի չքավոր աշակերտների կարիքները: Ի դեպ՝ այս վարժարանը եղել է օրիորդաց գիշերօթիկ դպրոց կոլեջի կարգավիճակով, 1919 թ. հուլիսի 24-ին քեմալականներն այս դպրոցի շենքում էին գումարել այսպես կոչված «Արեւելյան վիլայեթների իրավունքների պաշտպանության ազգային միության» առաջին համագումարը, որտեղ բացման խոսքով ելույթ էր ունեցել քեմալական շարժման առաջնորդ Մուստաֆա Քեմալ փաշան, որը հոտագայում ստացավ «Աթաթուրք» մականունը: Այսինքն վարժարանի շենքը նույնպես պատմական է Թուրքիայի համար, ինչպես հիմնադրամինը, ուստիեւ պետականացվել էր երկրում հանրապետական կարգերի հռչակումով:
Գալով «Սանասարյան» հիմնադրամին, ապա նրա վարչության շենքն էլ, ինչպես «Ակօս»-ն է նշում, առանց դատարանի որոշման պետականորեն առգրավվել եւ Ստամբուլի քաղաքապետարանին էր հանձնվել 1930-ին: Հակառակ Կ. Պոլսո հայոց պատրիարքարանի՝ առգրավումը չեղյալ հայտարարելու դատական հայցին, դատարանը մերժել էր դրա քննարկումը: Հիմք ընդունելով դատարանի մերժումը, 2011-ին պատրիարքարանը ձեռնամուխ է լինում նշված ապօրինի որոշումի չեղարկման գործին: 2014 թ. հուլիսի 3-ին Ստամբուլի դատարանը թեեւ ընդունում է պատրիարքարանի հայցը, սակայն հետո նույնպես մերժում, պատճառաբանելով, թե չունի տվյալ գործը քննարկելու իրավասություն:
Այս անգամ պատրիարքարանը դիմում է վճռաբեկ դատարան, սակայն Հիմնադրամների գլխավոր վարչությունը իր քմահաճույքով 10 տարի ժամկետով վարձակալության է տալիս «Սանասարյան» իջեւանատան շենքը: Ստեղծված իրավիճակում պատրիարքարանը, որպես հիմնադրամի ներկայացուցիչ, անհատական դիմում է ներկայացնում Թուրքիայի Սահմանադրական դատարան, ընդգծելով որ «Սանասարյան» հիմնադրամն ստեղծվել է չքավոր աշակերտների կարիքներն ու ուսուցման ծախսերը հոգալու բարեգործական նպատակներով: Հատկանշական է, որ Սահմանադրական դատարանն այս անգամ ոչ միայն ընդունում է պատրիարքարանի դիմումը, այլեւ ապօրինի է ճանաչում «Սանասարյան» իջեւանատան առգրավումը պետության կողմից:
Հ. ՉԱՔՐՅԱՆ
