Այս գարնանը Երեւանում Հայկական Երաժշտական Համաժողովի ջանքերով հրատարակվել են կոմպոզիտոր, միջազգային մրցույթների դափնեկիր, Հայաստանի Կոմպոզիտորների Միության անդամ Արփինե Կալինինայի՝ լարային քառյակի համար գրված «Ապրիլի 24» եւ «Սերենադ» ստեղծագործությունները: «Ապրիլի 24» ստեղծագործությունն առաջին անգամ հնչել է Ցեղասպանության 100-րդ տարելիցի օրը՝ 2015 թ. ապրիլի 24-ին, Լոնդոնի Թագավորական Երաժշտական Ակադեմիայում (որի շրջանավարտն է Արփինե Կալինինան)՝ բրիտանական «Արթեզիան» լարային քառյակի կատարմամբ: Ստեղծագործության համար ոգեշնչման աղբյուր է դարձել «Վահագնի ծնունդը» գողթան երգը՝ որպես վերածննդի խորհրդանիշ: Իսկ «Սերենադը» Արփինե Կալինինան գրել է 2020 թ. Բարտոկի անվան Կոմպոզիտորների Համաշխարհային մրցույթի (Հունգարիա) համար: Ստեղծագործությունը մտել է հեղինակավոր մրցույթի եզրափակիչ փուլ, դասվել աշխարհի 59 երկրից ներկայացված 348 լարային կվարտետներից ընտրված լավագույն ութնյակի շարքը:
Վերոնշյալ ստեղծագործությունները հրատարակությունից առաջ կատարվել են Չինաստանի Շանհայ քաղաքում կայացած ժամանակակից երաժշտության համերգին՝ չինական «Նովուս-Կլասիկա» կամերատայի մեկնաբանությամբ՝ «Գարնանային թռչուն» նախագծի շրջանակում: Կամերատայի հիմնադիրը, դիրիժորն ու համերգի նախաձեռնողը չինացի տաղանդավոր երիտասարդ դիրիժոր Ծին Յուկուանգն է, որը նաեւ Արամ Խաչատրյանի անվան դիրիժորների միջազգային մրցույթի դափնեկիր է: Նա համերգի ժամանակ խոսել է Արփինե Կալինինայի ստեղծագործությունների, ինչպես նաեւ ապրիլի 24-ի խորհրդի մասին: Համերգին, ինչպես եւ Արփինեի ստեղծագործություններին, անդրադարձել է չինական ամենամեծ երաժշտական պարբերականը՝ «Յինյուե ճուբաոն» (երաժշտական շաբաթաթերթ):
Արփինե Կալինինան աշխատում է Երեւանի Կոմիտասի անվան պետական կոնսերվատորիայում, կոմպոզիցիա է դասավանդում Երեւանի Սայաթ-Նովայի, Տիգրան Չուխաջյանի անվան երաժշտական դպրոցներում եւ Ավետ Տերտերյանի անվան արվեստի դպրոցում: Նրա սաները հաջողություններ են գրանցում կոմպոզիցիայի ասպարեզում, պատանի կոմպոզիտորների մրցույթների եւ փառատոների մասնակիցներ ու դափնեկիրներ են: Արփինե Կալինինան միջազգային մրցույթների դափնեկիր է` ներառյալ Ռուսաստանի Դաշնության Արվեստի ասպարեզում բարձրագույն նվաճումների համար շնորհվող «Տրիումֆ» մրցանակը:
Ա. Բ.
