Վերջերս ՀՀ Գիտությունների Ազգային Ակադեմիայում անցկացվեց Գիտության եւ տեխնոլոգիաների ոլորտում եվրոպական համագործակցության (COST) ծրագրի տեղեկատվական օրը: COST ծրագիրը ֆինանսավորում է հետազոտական ցանցեր, որոնք կոչվում են COST գործողություններ: Դրանք միավորում են գիտնականներին եւ նորարարներին տարբեր ոլորտներից՝ չորս տարվա ընթացքում համագործակցելու նպատակով:
COST ծրագրի տեղեկատվական օրվա միջոցառումը կազմակերպել էին «Նորարարական գործընկերությանն աջակցման կենտրոն» հիմնադրամը, COST ասոցիացիան եւ ՀՀ ԳԱԱ միջազգային կապերի եւ երիտասարդական ծրագրերի վարչությունը: Միջոցառմանը մասնակցեցին ՀՀ ԳԱԱ նախագահության, COST ասոցիացիայի անդամներ, COST ծրագրի շահառուներ, ՀՀ գիտակրթական կառույցների ներկայացուցիչներ: Տեղեկատվական օրվա նպատակն էր ներկայացնել COST ծրագրի հիմնական դրույթները, ծրագրին մասնակցության ընթացակարգը, ֆինանսավորման հնարավորությունները:
Հարկ է նշել,որ ՀՀ ԳԱԱ-ն կարեւորում է միջազգային համագործակցությունը: ԳԱԱ-ն միջազգային մի շարք կազմակերպությունների անդամ է, ունի համագործակցության բազմաթիվ պայմանագրեր: ԳԱԱ ինստիտուտներն իրականացնում են ավելի քան 60 միջազգային դրամաշնորհային ծրագրեր:
COST գործողություններում ակտիվ եւ ընդգրկուն մասնակցությունը հրաշալի հնարավորություն կլիներ եվրոպական ու միջազգային գլխավոր խաղացողների հետ կապերի եւ համագործակցության հաստատման համար՝ որպես արդյունք ունենալով համատեղ հետազոտություններն ու միջազգային գիտական համագործակցությունը: Հասկանալի է, որ գիտության ոլորտում հետազոտությունների ֆինանսավորման աճը, նոր ծրագրերի իրականացումը նպաստում են գիտության միջազգայնացմանը, արդյունքների համատեղ օգտագործմանը:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
