Հոկտեմբերի մեկին կայանալիք մյուռնօրհնության անցկացման նոր ժամկետների մասին Ս. Էջմիածինը տեղեկություն չի հաղորդում: «Երբ նոր բան կլինի, մենք կասենք»,- ի պատասխան «Ազգ»-ի հարցման՝ ասացին Մայր աթոռից:
Մյուռոնի օրհնությունը, հիշեցնենք, հետաձգվեց Արցախում տեղի ունեցած սեպտեմբերտասիննյան երկօրյա պատերազմի ու արցախահայության բռնի տեղահանության պատճառով: Բայց Էջմիածինը, կարծես թե, չի շտապում հայտարարել՝ երբ է ի վերջո կատարվելու Հայ եկեղեցու կարեւորագույն արարողություններից մեկը, ինչին, ի դեպ, հավատացյալները սրտատրոփ են սպասում:
«Ազգ»-ի՝ Եկեղեցուն մոտ կանգնած աղբյուրները հայտնում են, որ Եկեղեցին մտադիր է Մյուռոնի օրհնությունը գարնանը՝ Մայր տաճարի այդքա՜ն երկարաձգված բացմանը զուգահեռ կատարել:
Հետաքրքրական է սակայն, որ հոկտեմբերի 1-ին ընդառաջ Մայր աթոռում մեկնարկել էին ծաղիկների օրհնության եւ եփման արարողությունները: Եվ, փաստորեն, այդ ամենը գարնանը նորից պետք է արվեն:
ՍԵՎԱԿ ՎԱՐԴՈՒՄՅԱՆ
