Անցյալ ամիս Ասպենի (Քոլորադո, ԱՄՆ) երաժշտական միջազգային փառատոնին մասնակցել է հայաստանցի ջութակահարուհի Դիանա Ադամյանը, որը կատարել է Արամ Խաչատրյանի Ջութակի կոնցերտը: Ասպենի հանրային ռադիոյի կայքէջում հրատարակված «Երաժշտություն հանուն խաղաղության պատերազմի ժամանակ» հոդվածում, ի թիվս փառատոնի այլ մասնակիցների, անդրադարձ կա նաեւ հայ ջութակահարուհուն: Նշված է, որ Հայաստանը պատերազմի մեջ էր Ադրբեջանի հետ 2020 թվականին եւ որ Ադամյանի ընտանիքն ապրում էր առաջնագծից ոչ հեռու: Աղջկա ազգականներից ոմանք զոհվել են հակամարտության ժամանակ: Եվ նա հիշում է, թե ինչպես են 17 տարեկան տղաները մասնակցել մարտերին: «Գիտե՞ք, մեծ քանակությամբ տղաներ կային, որ ուղղակի գնացին ու չվերադարձան»,- ասել է Ադամյանը:
Փետրվարի վերջին սկսված Ուկրաինայի պատերազմը վերադարձրել է Դիանայի հիշողությունները պատերազմի մասին: «Որպես հայ եւ որպես մարդ, որի երկիրը երկու տարի առաջ նման իրավիճակում էր, ինձ համար հիմա շատ դժվար է տեսնել, թե ինչ է կատարվում, եւ հիշել իմ զգացմունքները, երբ ընտանիքս Հայաստանում էր,- ասել է Ադամյանը:- Ես շատ ուկրաինացի, ինչպես նաեւ ռուս ընկերներ ունեմ: Նրանք բոլորը խաղաղություն են ուզում: Եվ ես հիմա մտածում եմ, որ այն, ինչ անում էի երկու տարի առաջ Հայաստանի համար, հիմա մենք պարզապես պետք է խոսենք երաժշտության միջոցով, քանի որ երաժշտությունը միակն է, որ ստիպում է մարդկանց մոռանալ ցավը եւ լինել այնպիսին, ինչպիսին նրանք կան: Այդ պատճառով պետք է խոսենք երաժշտության հետ եւ խոսենք հանուն խաղաղության»:
2000-ին ծնված Դիանա Ադամյանը 2018 թվականին Մենուհինի անվան միջազգային մրցույթում արժանացել է առաջին մրցանակի: 2020 թվականին նա հաղթել է նաեւ Խաչատրյանի անվան ջութակահարների մրցույթում, որն անցկացվել է առցանց՝ պսակաժահրի համավարակի հայտարարման պատճառով:
Ա. Բ.
