Նախորդ շաբաթ իրազեկել էինք արդեն, որ Հայաստանի մասին գերմանալեզու լրահոսն այս օրերին նկատելի աշխույժ է, եւ որ սակավ է պատահում, թղթակիցները գրում են նաեւ մեր երկրում լինելով: Հայաստանյան ԶԼՄ-ներում ծանուցում եղավ, որ գերմանացի լրագրողների Հայաստան այցին աջակցել է գերմանական «Ֆրիդրիխ Էբերտ» հիմնադրամը, ինչպես նաեւ մի հավելյալ տեղեկություն՝ ի շարս տարբեր հանդիպումների, նրանց ընդունել են «Թաթոյան» հիմնադրամում: Այսինքն՝ լրագրողներին տրամադրվել են հստակ, ստույգ, մանրամասն փաստեր: Տեղի սղության պատճառով հակիրճ արձանագրենք հրապարակումներում նկատելի շեշտադումները:
t-online կայքում Թոբիաս Էսերի (Tobias Eßer) հոդվածներին անդրադարձել էինք, նա իր հայաստանյան շարքը շարունակեց Սոթքի եւ Ջերմուկի, Շուռնուխի մասին պատմելով: Մարտի 27-ին հրատարակված նրա հոդվածի վերնագիրը՝ «Եթե ռուսներն այստեղ չլինեին, իրադրությունն ավելի վատ կլիներ», թեեւ ուղղակի մեջբերում է Շուռնուխի մի բնակչի խոսքից, սակայն այլ լրատվամիջոցներում էլ կարծես նշմարվում է ռուսներին ուղղված քննադատության մեղմացում:
«Ֆրանկֆուրտեր ալգեմայնե ցայթունգը» մարտի 25-ի տեղեկատվությունն այսպես է վերնագրել՝ «Սահմանամերձ շրջանի շուրջ վեճ. Ռուսաստան. Ադրբեջանը խախտել է Հայաստանի հետ հրադադարի համաձայնագիրը»: «ՖԱՑ»-ը փոխանցում է «Ֆրանսպրեսի» լուրը՝ հղում անելով «ՌԴ պաշտպանության նախարարության տվյալներին՝ ադրբեջանական զինուժը հատել է սահմանազատման գիծը: Ռուս զինվորներն այժմ էսկալացիան նվազեցնելու միջոցներ կձեռնարկեն»:
Մարտի 26-ին «Դոյչե վելլեի» թղթակից Անյա Քոխը Երեւանից գրած հոդվածում պատմում է, որ Հայաստանում աճում է վախը, թե նոր պատերազմ կսկսվի: Նա նկարագրում է, թե 5000-6000 հոգի արդեն ռազմական նախապատրաստական փորձառություն են կուտակել ՈՄԱ կազմակերպության եռամսյա պարապմունքներին մասնակցելով: Անյա Քոխը պատմում է լքված Սոթքի մասին, գարնանը ենթադրվող Ադրբեջան-Հայաստան լարվածության աճի, ռուս խաղաղապահների պարտավորությունների ոչ լիարժեք կատարման, ԵՄ խաղաղարար առաքելության հետ՝ ՀՀ բնակչության հույսի: «Դոյչե վելլեն» փոխանցում է ԵՄ առաքելության ղեկավար Մարկուս Ռիթթերի խոսքը, թե իրենք հեռադիտակ եւ տեսախցիկ ունեն միայն, հարձակման ժամանակ միջամտել չեն կարող: Եւ քանի որ դիտորդներին արտոնված չէ ադրբեջանական տարածքում գործել, նրանք չեն կարող դատել, թե զորքերի տեղաշարժ, նոր հարձակման նախապատրաստություն կա՞, թե՞ ոչ: Եթե գարնանը Ադրբեջանի ենթադրվող հարձակումը տեղի չունենա, ուրեմն «մեր առաքելությունն արդեն հաջողված կլինի», ասում է Ռիթերը: op-online առցանց լրատուն մարտի 29-ին թարմացված տարբերակով վերնագրային հիշեցում տեղադրեց՝«Հրադադարը վտանգի տակ է. Հայաստանն ու Ադրբեջանը զինվում են՝ հաջորդ հակամարտության համար»: Տեքստի ընթերցանությունն իհարկե պարզաբանում է, որ զինվելը Ադրբեջանի պարագայում հարձակումն է՝ զենքուզորքն առաջ մղելն է, իսկ Հայաստանում՝ այն պաշտպանական բնույթ ունի՝ նոր հավանական պատերազմին պատրաստվելը, եւ հղում անելով «Դոյչե վելլեի» հոդվածին, իրազեկում է հայ երիտասարդների՝ ՈՄԱ-յի դասընթացներին հաճախելիության աճի մասին:
«Նոյե ցյուրխեր ցայթունգը» մարտի 27-ին անդրադառնում է Արցախում տիրող մտահոգիչ իրավիճակին, ընդգծելով նաեւ այն հանգամանքը, որ Բաքուն չի կատարում Հաագայի պահանջը: Շվեյցարական SRF-ի աշխատակից Յուդիթ Հուբերը (Judith Huber) նույնպես մարտի 23-ի հրապարակմամբ անդրադառնում է Ջերմուկին: Գերմանալեզու հոդվածներում ակնարկ կա նաեւ, թե Ռուսաստանը Հայաստանի հանդեպ լուրջ հետեւանքներ ենթադրող սպառնալիք կկիրառի, եթե Միջազգային քրեական դատարանի վավերացումը լինի:
ԱՆԱՀԻՏ ՀՈՎՍԵՓՅԱՆ
Գերմանիա
