Վերջերս ընթերցողի սեղանին է դրվել փառավոր մարտական ուղի անցած հետախույզ-սպա Սարգիս Ստեփանյանի մասին պատմող «Բազկամարդը» գիրքը, որը մի յուրօրինակ հարգանքի տուրք է այն մարդուն, որ հոգու անմնացորդ նվիրումից բացի հայրենիքին է նվիրել նաեւ երկու ոտքերն ու մեկ ձեռքը: Գրքի հեղինակը հենց գրքի հերոսն է՝ Սարգիս Ստեփանյանը, որն այս կարեւոր աշխատանքն իրականացրել է ռազմական լրագրող Դավիթ Դավթյանի գործակցությամբ.
««Բազկամարդը» պարզապես կենսագրական չէ, այլ ճանաչողական եւ ուսուցողական ձեռնարկ, հոգեբանական խորհրդատվություն, թե ինչպես է հնարավոր դուրս գալ ամենամեծ ողբերգությունից եւ փոխել իրականությունը։ 2014-ին ծանր վիրավորվելու պատճառով երկու ոտքն ու աջ ձեռքը կորցնելուց 3 ամիս անց Սարգիս Ստեփանյանը սկսում է քայլել, 3 տարի անց դառնում աշխարհի չեմպիոն։ Իր օրինակով ապացուցում է, որ անելանելի վիճակներ չկան, եթե ունես կամքի ուժ եւ կյանքի ծարավ։ Գիրքը հաշմանդամություն ունեցողներին կօգնի արագ գտնել ոտքի կանգնելու կամք եւ նոր հորիզոններ կբացի նրանց համար։ Գրքի հերոսն այսօր առաջնորդում է մի ամբողջ խմբի, ինչպես նախկինում, վիրավորումից առաջ։ Շատերն են նրա շնորհիվ վերագտել իրենց, կրկին հուսավառվել, պայքարել ու դարձել պրոֆեսիոնալ, ռեկորդակիր մարզիկներ»- գրում է հրատարակչությունը։
Սարգիս Ստեփանյանը (ծնվ.1983 թ.) հայկական բանակի լավագույն հատուկջոկատայիններից է։ 2014-ին ականի պայթյունի պատճառով հետախույզը զրկվեց երկու ոտքից եւ աջ թեւից։ Բայց որոշեց ոտքի կանգնել ու մարզվել։ Այժմ աշխարհի ու Եվրոպայի բազկամարտի բազմակի չեմպիոն է։ Սարգիս Ստեփանյանը հաշմանդամություն ունեցողների համար հիմնել է մարզասրահ, վերականգնողական կենտրոն եւ իր համախոհների հետ պատրաստում է հաշմանդամային սպորտի ապագա չեմպիոնների։
Դավիթ Դավթյանը (ծնվ.1992 թ.) ռազմական լրագրող է, վավերագրել է 2020-ի Արցախյան պատերազմը։ 2015-ից «Զինուժ» հեռուստածրագրի մեկնաբանն է։ Մանկավարժական համալսարանի շրջանավարտ Դավիթ Դավթյանն աշխատել է «Արմնյուզ» (2011-2015) եւ «Արմենիա» (2015-2018) հեռուստաալիքների լրատվական ծրագրերում։ Սա նրա հեղինակած առաջին գիրքն է։
Գեւորգ ԳՅՈՒԼՈՒՄՅԱՆ
