«Ազգ»-ի զրուցակիցն է «Լուսավոր Հայաստան» կուսակցության անդամ Անի Սամսոնյանը
– Ձեր հայտարարությունը, կապված Բագրատ Սրբազանին Երեւանում սպասելու հետ, շատ քննարկվեց, քանզի շատերը «Լուսավոր Հայաստանին» մեղադրում են պրոիշխանական քաղաքականություն տանելու մեջ: Մայիսի 9-ին որտե՞ղ է լինելու ԼՀԿ-ն:
– Շատերը թող նախ իրենց սեփական քաղաքական ուղին գնահատեն ու վերանայեն, հետո մնացածին քննադատեն: Մենք միշտ առաջնորդվել ենք մեր խղճով ու հավատամքով եւ ազնիվ եղել հանրության առջեւ: Բագրատ Սրբազանի շարժմանը եւս սատարում ենք՝ ելնելով այն հավատամքից, որ մարդկանց արդար բողոքի ձայնը չպետք է լռեցվի: Մայիսի 9-ին դուք մեզ կտեսնեք շարժման մյուս մասնակիցների կողքին:
– Վերջերս ԼՀԿ-ն կարծես կոշտացրել է խոսույթը իշխանությանը քննադատելու հարցում: Ի՞նչ է փոխվել:
-Խնդիրը հենց դրանում է, որ բան չի փոխվել եւ չի փոխվելու: 2021 թվականին մենք համերաշխության կոչ արեցինք եւ ընտրություններից հետո թույլ տվեցինք, որ մեր կուսակցության նախագահը ներգրավվի արտաքին քաղաքական ու դիվանագիտական ճակատում, որպեսզի փորձենք միացյալ ջանքերով երկիրը հանել այն խորը ցեխից, որի մեջ մտանք 2020 թվականի 44-օրյա պատերազմից հետո: Բայց մենք ընթացքում տեսանք, որ իշխանությունը տապալել է բանակցային դիվանագիտությունը, հատել է իր իսկ հայտարարած կարմիր գծերը, իսկ հիմա պատերազմի սպառնալիքով գնում է միակողմանի զիջումների: Մենք լոբբիինգ ենք արել, որ այսպես շարունակել հնարավոր չի, պետք է վերանայել բանակցային մարտավարությունը եւ փոփոխություններ անել արտաքին քաղաքական կուրսում: Բայց ոչինչ չի փոխվել, հակառակը՝ փոսը գնալով խորանում է Հայաստանի շուրջը, իսկ մարդկանց շարունակում են ստերով կերակրել:
– Ձեր գնահատականով ճի՞շտ էր համագործակցության գնալ մի իշխանության հետ, որը որեւէ մեկի չի լսում, խորհուրդ չի ընդունում:
-Ժամանակը եւ իրադրությունը մեզ ստիպեց մի կողմ թողնել նախապաշարմունքները, տարաձայնությունները, մեր վրա հարձակումները եւ աջակցության ձեռք մեկնել: Համենայնդեպս, մենք փորձեցինք եւ հանգիստ ենք մեր խղճի առջեւ: Հիմա եթե հարցնեք՝ կհամագործակցե՞ք արդյոք իշխանության հետ, ես միանշանակ կասեմ, որ երկրորդ անգամ նույն գետը չեն մտնում, այս իշխանությունը տկար է եւ վտանգավոր:
–Եթե ակտիվ փողոց լինի, ապա որո՞նք են լինելու ձեր քայլերը:
– Շարժումը նոր է մեկնարկել, եւ ես հույս ունեմ, որ այն՝ ի դեմս Բագրատ Սրբազանի, կառաջադրի արդար, իրատեսական նպատակներ, կլինի պաշտպանված վարկաբեկող քաղաքական միջամտություններից եւ հետեւողական կգնա մինչեւ վերջ: Այս պայմաններում մենք էլ կաջակցենք մինչեւ վերջ:
ՍԵՎԱԿ ՎԱՐԴՈՒՄՅԱՆ
