ՆԱԻՐ ՅԱՆ
Խոստովանում եմՙ 3 տարեկանում մեր հարեւանի տանից գողացել եմ ծիրանի կորիզ, կոնֆետի փայլուն թղթեր ու նրանց կապույտ թութակիՙ գետնին թափված մի քանի փետուր: Դրանք զգույշ դրել եմ գրպանս ու բերել մեր տուն: Մայրս զգեստս լվանալիս է գրպաններիցս առգրավել “գողոնը”, հետո ծիծաղելով մտել է հարեւանի տուն, ցույց տվել այն: Հարեւանուհիներով մի լավ ծիծաղել են, թշերս պաչպչել. հետն էլ առիթ էր, մի բաժակ սուրճ են խմել միասին:
Հիմա սա գրում եմ, ու երբ թերթում տպագրվի, ամեն օր վախով սպասելու եմ, որ դիմակավորված ու սպառազինված ոստիկանները կներխուժեն մեր տուն, ամուսնուս ու երեխաներիս ներկայությամբ ինձ կտապալեն գետնին, ձեռնաշղթաներ կհագցնեն ու քարշ տալով մտցնելով մեքենաՙ ո՜վ իմանա, թե ոստիկանության որ բաժին կտանեն: Գուցե էլի՞ Մարտունու, ինչպես Երեւանիցՙ իր տան մոտից, բերման են ենթարկել ու Մարտունու բաժին տարել Սայաթ Շիրինյանին:
Պարզից էլ պարզ է, որ նման զավեշտալի խեղկատակություններով իշխանությունները փորձում են հանրության ուշադրությունը գլխավոր թեմաներից ու իրադարձություններից շեղել: Արդեն երկու տարիՙ այսպիսի կրկեսային ներկայացումներ են բաց թողնում արենա, որ ժողովուրդը զբաղվի, իսկ իրենք կուլիսներում իրենց սեւ գործն անեն:
Իսկ բացի շեղելու բուն ծրագրից, վերեւներում նստածները վրեժ են հանում իրենց քննադատողներից, բայց ոչ թե տղամարդավարի, արժանավայել կերպով, այլ սողալով, քողարկված, հերսից ու նախանձից կապտած, կեղտոտ խաղի անբարոյական միջոցներով:
Հիշեցնենք, որ 2020-ի օգոստոսին “Իրազեկ քաղաքացիների միավորում” ՀԿ ծրագրերի համակարգող Դանիել Իոաննիսյանն “աչքադրել” էր ոստիկանության գնդապետ Սայաթ Շիրինյանին ու տեսագրել, որ նա իր ավտոտնակում դիմակ չի դրել: Հետո Իոաննիսյանը հրապարակ գցեց իր կարծիքը, թե միգուցե Շիրինյանի ավտոտնակն անօրինական է կամ օրենքի խախտումով է սեփականացվել, ինչին հաջորդեց ոստիկանության գնդապետի կոշտ ու Իոաննիսյանին պատվազրկող հայտարարությունը:
Սայաթ Շիրինյանը պարբերաբար քննադատում է իշխանություններինՙ փաստերով ու հիմնավորումներով: Ի վերջո, նա ընդդիմադիր “Հայաստան” դաշինքի ներկայացուցիչ է:
Լրատվամիջոցները գրեցին, որ օրերս Ոստկանությունում տեղի է ունեցել կոլեգիայի նիստ, որից հետո ոստիկանապետ Վահե Ղազարյանը սրտնեղել է, թե Սայաթ Շիրինյանն իրեն անպատվել է: Ղազարյանը հրահանգել է այսուհետեւ շաբաթը մեկ Շիրինյանին բերման ենթարկել ու տեղափոխել ոստիկանության տարբեր ստորաբաժանումներ:
Հունվարի 24-ին Սայաթ Շիրինյանին բերման ենթարկելով ու երկու ժամ պահելով անտեղյակության մեջՙ նրան չի թույլատրվել անգամ փաստաբանի կամ ընտանիքի անդամների հետ խոսել, տեղեկացնել, որ իրեն բերման ենթարկելուց հետո տեղափոխել են Գեղարքունիքի մարզ:
“Ես կասկածվում են 2021-ի օգոստոսին Մարտունու Ներքին Գետաշեն գյուղից սրճեփ գողանալու մեջ: Ոստիկանապետ Վահե Ղազարյանն այնքան տգետ է, որ անգամ գործ սարքել չգիտի: …Ես սրճեփ եմ գողացել, պատկերացնո՞ւմ եք”,- հունվարի 24-ի երեկոյան իրեն բաց թողնելուց հետո ասել է Սայաթ Շիրինյանը:
Նրա փաստաբան Բենիկ Գալստյանը ներկայացրել է, թե ինչ է տեղի ունեցել ոստիկանության Մարտունու բաժնում:
“Սայաթ Շիրինյանին հարցաքննել են վկայի կարգավիճակով, նա ցուցմունք է տվել, որ տեղյակ չէ սրճեփից, ոչ էլ Գետաշեն գյուղի գտնվելու վայրից: Ես կարծում եմ, որ նման բաները հորինում են լրացուցիչ նեղություն տալու համար: Ռեպրեսիաներ են, եւ սա ժամանակի ընթացքում ազդելու է ողջ բնակչության վրա”:
Լրատվամիջոցները գրում են, որ Սայաթ Շիրինյանը պետք է պատրաստ լինի, որ առաջիկայում էլ են նրա գլխին նմանատիպ գործեր սարքվելու: Նա էլի է բերման ենթարկվելու: Իսկ եթե հանկարծ պարզվի, որ Սայաթ Շիրինյանը փոքր ժամանակ ինձ նման ծիրանի կորիզ կամ կոնֆետի փայլուն թուղթ է գողացել հարեւանի տնից… Չէ՞ որ ոստիկանության գնդապետերն էլ են ժամանակին երեխա եղել ու մանկական թուլություններ ունեցել: Աստված ոչ անի. գործն ավելի կլրջանա:
