Ադրբեջանի հայտնի լրագրող, 2017-ին Նոբելյան այլընտրանքային մրցանակ ստացած Խադիջա Իսմայիլովայիՙ հունվարի 20-ին գերմանալեզու” zenith”-ին տված ծավալուն հարցազրույցը լրջորեն սասանում է նրա միջազգային վարկը: Շատ հակիրճՙ այդ հարցազրույցի ուշագրավ դրվագներից:
“Ղարաբաղյան 2-րդ պատերազմի ժամանակ Արեւմուտքը քննադատեց Ձեր որոշ հայտարարություններ” ակնարկին ի պատասխան Իսմայիլովան պարզաբանում է. “Երբ Ղարաբաղի հարցում հայերին դեմ եմ, ասում են, թե զղջում են, որ ինձ սատարել են: Եթե դրա մասին վաղօրոք իմանայի, կմերժեի նրանց նեցուկ լինելը:
Ալիեւին չեմ պաշտպանում, բայց Ղարաբաղի հարցում նա լիովին իրավացի է”: “Բայց արտերկրում դա դիտվում է որպես պատերազմ հրահրող հայտարարություն”,” zenith”-ի հակադարձմանը հետեւյալ պատասխանն է տրվում. “Պատերազմին կողմ չեմ, դեմ եմ բռնազվթմանն ու ատելության խոսքին: Պատերազմից առաջ արեւմուտքից հրավեր շատ կար, իսկ հիմա ինձ արդեն կարծես ոչ ոք չի ուզում: Սա հիասթափեցնում է”:”Ես պատրաստ չեմ հրաժարվել իմ համոզմունքներից, միայն նրա համար, որ որեւէ մեկին հաճոյանամ կամ դրսից ավելի շատ ծափահարեն ինձ: Զավեշտն այն է, որ դրսում ոչ ոք ադրբեջանական դիրքորոշման մասին չի բարձրաձայնում, եթե դրա դիմաց գումար չկա”, խոստովանում է Խադիջա Իսմայիլովան եւ շարունակումՙ “Մեր օլիգարխները սիրում են Լոնդոնում կամ այլուր խոշոր գումարներով կազմակերպություններ ստեղծել, որ նպաստում են հակամարտության վերաբերյալ ադրբեջանական տեսակետը ներկայացնելուն: Շատ ավելի լավ կլիներ, եթե չանեին: Խոսքս չի վերաբերում միայն “Եվրոպայի ադրբեջանական ընկերակցությանը”: Ցավոք սրտի, քանի դեռ մեր կառավարությունն ու օլիգարխները չեն վճարում դրա համար, միջազգային հանրությունը պատրաստ չէ ընդունել ադրբեջանական տեսակետը”:
“zenith”-ի հաջորդ հարցը հետեւյալ բովանդակությունն ունի. “ԼՂ ապագա կարգավիճակի հարցը նույնիսկ պատերազմից հետո լուծված չէ: Շատ հայեր կարող են ասել, թե Ադրբեջանն այնքան ավտոկրատ կառավարում ունի, որ անհնարին է ԼՂ-ի հայերին ապրել ադրբեջանական տիրապետության տակ”: Իսմայիլովան այսպես է պատասխանում. “Հակամարտությունը Իլհամ Ալիեւից չի սկսվել: Դաժանագույն բախումները նրա իշխանության գալուց շատ առաջ են եղել: Ռուսաստանը թեժացնում է հակամարտությունը, քանի որ չի ցանկանում կորցնել կենտրոնի իր ազդեցությունը: Եւ հիմա նույնիսկ ռուսական զորք է տեղակայված մեր տարածքում”: Իսկ ատելություն, ըստ Խադիջա Իսմայիլովայի, սերմանում են Ռուսաստանը եւ հայկական սփյուռքը:
ԱՆԱՀԻՏ ՀՈՎՍԵՓՅԱՆ
