Քյոլնից հեռարձակվող կաթոլիկական Domradio-ն հոկտեմբերի 23-ին կարեւոր է համարել անդրադառնալ Իսրայելում հայկական 1600-ամյա ներկայությանը՝ ներկայացնելով Երուսաղեմի հայկական թաղամասում 1995-ից ի վեր փակ հայկական թանգարանի վերաբացման հանդիսավոր արարողությունը: Թանգարանը 2 ցուցադրություն է ներկայացնում՝ Ավետյաց երկրում հայոց պատմության եւ Հայոց ցեղասպանության մասին: Domradio-ի իրազեկմամբ, Երուսաղեմի հայկական թաղամասը՝ Մայր տաճարով, գրադարանով, դպրոցներով եւ աստվածաբանական ճեմարանով մինչ այժմ այցելուների համար անհասանելի է եղել՝ վանական համալիրի հաստ պատերի հետեւում պարփակված է մնացել:
«Էդվարդ եւ Հելեն Մարտիկյան» թանգարանի վերաբացմամբ դա պետք է փոխվի: «Արժե պատմել Սուրբ Երկրում հայերի պատմությունը», ասում է ճարտարապետ Հարություն Պեզճյանը, որ պատմաբաններ Կլոդ Մութաֆյանի եւ Ռայմոն Գեւորգյանի հետ իրականացրել է վերաբացման նախագիծը:
ԱՆԱՀԻՏ ՀՈՎՍԵՓՅԱՆ
