Արցախի թեմի նոր առաջնորդըՙ Վրթանես եպս. Աբրահամյանը, «Սպուտնիկ Արմենիայի» հետ զրույցում մի շարք կարեւոր եւ ոշագրավ հայտարարություններ է արել: Օրինակՙ անդրադառնալով բանակ-եկեղեցի հարաբերություններին եւ բանակի հզորացմանը զուգահեռ նոր եկեղեցիների կառուցման խնդրին, նա ասել է, որ նախընտրում է նա՛խ հզորացած տեսնել բանակը, ապա միայն եկեղեցիներ կառուցել:
«Ես առավել կողմնակից կլինեմ, որ մեր բանակը հզորանա, քան թե մենք նոր եկեղեցի կառուցենք կամ վերանորոգենք: Կառուցեցինք եկեղեցին, վերանորոգեցինք, հետո՞: Եթե մեր բանակը տկար է, եկեղեցի վերանորոգելով չենք կարող շարունակել ապրել: Եթե մարմնով հզոր չես, հոգեւոր առաքելությունդ էլ չես կարող կատարել: Ես վստահ եմ. եթե Արցախը ամուր պարիսպներ ունենա, սահմանային գյուղերի բնակիչները աշխատանք ունենան, իրենք իրենց ձեռքո՛վ կվերանորոգեն իրենց տեղի վանքերը»,- ասել է նա:
Հոգեւոր առաջնորդի կարծիքով, առաջնային կարեւորությունն այսօր պետք է տրվի բանակաշինությանը, մարտական պատրաստվածությանը, հետո նոր հոգեւոր եւ մշակութային կյանքի հարստացմանը
«Եկեղեցին միշտ ասում էՙ ամուր հոգեւոր տան կողքին պետք է լինեն ամուր իշխանական տներ: Իշխանական տներից մեկն էլ բանակն է: Նրանք այդտեղ նախ կառուցեցին բերդը, ապա կամուրջը, հետո նորՙ եկեղեցին: Նույն առաջնահերթությամբ էլ մենք պետք է շարժվենք»,- իրավիճակը բացատրում է Վրթանես սրբազանը:
«Իշխանությունների ամեն որոշում ուղիղ հետեւանք է ունենում արցախցիների համար: Եթե Արցախի ապագան, վաղվա օրը պարզ լինի, դու էլ հնարավորություն ունենաս, պետք է նոր եկեղեցիներ էլ կառուցես, իսկ ավելի լավ էՙ հները, որոնք խոնարհված վիճակում են, վերանորոգես: Ես չեմ ասում, որ եկեղեցիներ պետք չէ վերանորոգել կամ հոգեւոր կյանքը պետք է առանձնանա բանակից, հակառակըՙ աղոթող զինվորը աննկուն զինվոր է, մեր պապերը խաչերը ձեռքին են գնացել հայրենիքը պաշտպանելու: Ու մենք էլ ասում ենքՙ հույսը առ Աստված երբեք չի ամաչեցնում, բայց այդ հույս ունեցողն էլ պետք է իր վաղվա, իր իշխանությունների որոշումների հանդեպ վստահություն ունենա», – ասում է Սրբազանը:
