Օրեր առաջ «Հայաստան» խմբակցության պատգամավորներն այցել էին Քանաքեռ-Զեյթուն ԲԿՙ տեսակցելու պրոֆեսոր, ԱԺ պատգամավոր Արմեն Չարչյանին , որի առողջական վիճակը «Նուբարաշեն» ՔԿՀ-ում կտրուկ վատացել էր:
Հիշեցնենք, որ փաստաբան Էրիկ Ալեքսանյանը միջնորդություն էր ներկայացրել Արմեն Չարչյանի առողջական վիճակից ելնելովՙ փոխել խափանման միջոց կալանքը, որը, սակայն, չի բավարարվել:
Սեպտեմբերի 15-ին մի խումբ բժիշկներՙ բժշկական խալաթներով, բողոքի ակցիա էին կազմակերպել ՀՀ Դատախազության դիմացՙ պահանջելով հանդիպում գլխավոր դատախազի հետ:
Բժիշկներն ահազանգում ենՙ Արմեն Չարչյանի վիճակն է՛լ ավելի է վատացել, կալանավայրում գտնվելը նրա հիվանդությունների հետ անհամատեղելի է:
«Արմեն Չարչյանն ունի ինսուլինակախյալ շաքարային դիաբետ հիվանդություն: Նրա համարյա բոլոր օրգան համակարգերը ախտահարված են, դրանք ծանր ախտահարումներ են: Այսօր իմացա, որ նաեւ աչքն է ախտաբանական գործընթացի մեջ մտել: Գոյություն ունի կառավարության որոշում, որտեղ հստակ սահմանվում է այն հիվանդությունների ցանկը, որոնք անհամատեղելի են քաղաքացու կալանքի հետ: Այս ցանկի մեկ հոդվածին էին համապատասխանում Արմեն Չարչյանի առողջական վիճակի բարդացումները, այսօր իմացա, որ արդեն 4-ի է հասել: Խոսքը ծանր բարդությունների մասին է: Մեկ շաբաթ հետո այս 4-ը կդառնա 8»,- ասել է բժիշկ Սամվել Սահակյանը :
Արմեն Չարչյանի փաստաբանը դիմել է, որպեսզի հրատապ նիստ նշանակվի: Նիստը նշանակվել է հոկտեմբերի 1-ին:
Բժիշկ Սամվել Սահակյանին հաջողվել է հանդիպել գլխավոր դատախազի հետ: Նա ներկայացրել է Արմեն Չարչյանի հիվանդության վտանգներն ու հավանական հետեւանքները:
«Պարոն դատախազը ճանապարհ ցույց տվեց, ասացՙ միանշանակ կողմ է իմ դիրքորոշմանը, պարզապես համապատասխան ախտորոշումների հիմնավորումներ է պետք է ներկայացնել: Դա ներկայացնելու դեպքում խոսք տվեց, որ ամեն ինչով մեզ կօգնի, իրենք եւս կմիջնորդեն հրատապ նիստ հրավիրելու հարցով, որտեղ եթե մեր փաստաթղթերը համարեն հիմնավոր, նաեւ մեր խնդրանքի երկրորդ բաժինը կկատարվի»,-տեղեկացրել է բժիշկ Սահակյանը:
Փաստորեն, ամեն օրը, ամեն րոպեն կարող է ճակատագրական լինել Արմեն Չարչյանի համար. Հապաղելը լի է վտանգներով, սակայն հայտնի չէ, թե «հրատապ նիստը» ե՞րբ կհրավիրվի:
