Թուրքական «Biane» լրատվական կայքը, որը հայտնի է իր ընդդիմադիր դիրքորոշմամբ, օրերս անդրադարձել է Հայոց ցեղասպանության 106-րդ տարելիցին ու ապրիլի 24-ի նշանակությանըՙ հաջորդաբար ներկայացնելով այդ ժամանակաշրջանի աղետալի իրադարձությունները:
Ուշագրավ է հրապարակման վերնագիրը, որը հետեւյալն էՙ «Ցեղասպանությունը սկսվել է նրանցից. հայ գրողներ եւ լրագրողներ»:
«Հայոց ցեղասպանության սկիզբ է համարվում այն, որ 1915թ. ապրիլի 24-ին ձերբակալվեցին եւ աքսորվեցին պոլսահայ մտավորականները»,- գրում է կայքը:
Անդրադարձ է կատարված նաեւ «1915 ապրիլի 24. Ստամբուլ, Չանքըր, Այաս, Անկարա» գրքի հեղինակ Նեսիմ Օվադիա Իզրայիլի կազմած հայ մտավորականների անվանացանկը, որոնք զոհ են գնացել Հայոց ցեղասպանությանը: Հստակ նշված են զոհերի մասնագիտությունը, աքսորման ամսաթիվն ու վայրը, եւ սպանության վայրը: Կայքը միաժամանակ հայտարարել է, որ նշված շարքը կարող են լրացնել մասնագետներն ու շահագրգիռ կողմերը:
