Ավելի վաղ լրատվամիջոցները հաղորդել էին, որ սույն թվականի մարտի 2-ին Թուրքիայի նախագահի աշխատակազմի հանրային կապերի վարչության ղեկավար Ֆահրեթթին Ալթունն Անկարայում հյուրընկալել է Ադրբեջանի մշակույթի նախարար Անար Քերիմովին: Մամուլի այդ ժամանակվա հաղորդագրությունների համաձայն, հանդիպման ժամանակ քննարկվել էին երկկողմ մշակութային մի շարք ծրագրեր, բայց բոլորովին վերջերս հայտնի դարձավ, որ հանդիպման մեխը եղել է թուրք-ադրբեջանական ֆիլմի ստեղծումը, որը պատմելու է Արցախյան վերջին պատերազմում թուրք-ադրբեջանական տանդեմի տարած հաղթանակի մասին:
Ավելինՙ խոսքը ոչ թե մեկ, այլ բազմաթիվ ֆիլմերի եւ նույնիսկ սերիալների մասին է, որոնք բոլորը պատմելու են պատերազմի մասին: Այս նախաձեռնության հեղինակն Էրդողանն է, որն արդեն ստորագրել է այդ հրամանագիրը: Ավելի վաղ Թուրքիայի նախագահը հրահանգել էր «պատշաճ գրքեր» հրատարակել «թյուրքական մեծ հաղթանակի» մասին:
Ըստ որոշ աղբյուրների պնդմանՙ այս պահին «պատերազմի փառաբանում-լուսաբանման» վրա են աշխատում բազմաթիվ հետազոտողներ, այդ թվումՙ պալատական գրողներ: Վերջիններիս անելիքը արձակ եւ չափածո գործեր գրելն է:
Ըստ Քերիմովի եւ Ալթունիՙ այս նախաձեռնությունը լինելու է «երկու եղբայրների սերտ բարեկամության ամրապնդողը»:
