Բրիտանական հանրահռչակ «Քրիստի՛զ» աճուրդի կենտրոնը, ըստ «Գրացիա» լրատվամիջոցի, օգոստոսի 22-ին հայտարարել է, որ մտադիր է բարեգործական աճուրդ կազմակերպել աջակցելու համար Բեյրութի տուժած արվեստասեր հասարակությանը:
Սարսափազդու պայթյունը օգոստոսի 4-ին հարվածեց ոչ միայն գործարար աշխարհին, այլեւ գեղագիտական ծառայություններ մատուցող կենտրոններին:
«Մենք բոլորս Բեյրութի կողքին ենք», «Արվեստը հօգուտ Բեյրութի» կարգախոսների ներքո առցանց եղանակով բարեգործական աճուրդը տեղի կունենա հոկտեմբերի վերջերից մինչեւ նոյեմբերի առաջին կեսը:
«Մեր բոլորի հիշողությունների մեջ ընդմիշտ կմնան ավերածությունների սրտաճմլիկ տեսարանները, իսկ մեր խոհերը կլինեն բոլոր այն ընտանիքների հետ, որոնք շատ բան կորցրեցին: Հույսով ենք մեր նախաձեռնությունը մի փոքր կթեթեւացնի նրանց հոգսերը», նշել է կենտրոնի գործադիր տնօրենի պաշտոնակատար Գիյոմ Չերուտտին :
Նախատեսվում է 40-50 ցուցանմուշ աճուրդի հանել, որոնց մեջ կլինեն ժամացույցներ, միջազգային եւ տարածաշրջանային արվեստի գործեր եւ ակնեղեն: Աճուրդից գոյացած գումարը հատկացվելու է վերականգնելու քաղաքի արվեստի եւ մշակութային կենտրոնները, ներառյալ Բեյրութի արդի եւ ժամանակակից արվեստի Սուրսոք թանգարանը:
