2020 թվականի մայիսի 27-ին Մոսկվայում իր աշխատանքները սկսեց 45-րդ հոբելյանական միջազգային ցուցահանդեսը: Այն հիմնականում իրականացվում էր օնլայն տարբերակով եւ դրան մասնակցում էին աշխարհի տարբեր երկրներ: Հայկական էներգետիկական ակադեմիայի հիմնադիր նախագահ, էներգետիկայի բնագավառի անվանի գիտնական, «Ազգ»-ի երկարամյա թղթակից Ստեփան Պապիկյանի գիտական աշխատանքը բարձր գնահատականի արժանացավ եւ մեծ արձաքանք ունեցավ: Այն տպագրվեց ցուցահանդեսի կատալոգում եւ արժանացավ հեղինակավոր դիպլոմի:
2020 թվականի ապրիլի 26-ից 29-ը Մոսկվա քաղաքում իր աշխատանքներն սկսեց Կրթության միջազգային սալոնը: Սալոնի գլխավոր կազմակերպիչներն էին` ՌԴ կառավարությունը, բարձրագոյն կրթության եւ գիտության նախարարությունը եւ այլ նախարարություններ ու գերատեսչություններ: Ստեփան Պապիկյանի գիտական աշխատանքն այստեղ նույնպես բարձր գնահատվեց եւ արժանացավ ոսկե մեդալի եւ պատվոգրի: Սալոնի աշխատանքներն իրականացվում էին օնլայն տարբերակով: Ուրախալի է, որ թագավարակի այս դժվարին պամաններում հայ գիտնականը աշխատում է արդյունավետ եւ միջազգային հեղինակավոր ցուցահանդեսների ժամանակ արժանանում լայն ճանաչման:
Հարկ է նշել, որ Ստեփան Պապիկյանը շուրջ 200 գիտական աշխատությունների հեղինակ է, բազմաթիվ ակադեմիաների անդամ: Նա ներկայումս մեծ ծավալի աշխատանքներ է կատարում Հայաստանի եւ Արցախի հանրապետությունների, ինչպես նաեւ համաշխարհային էներգետիկայի զարգացման համար: Հեղինակել է «Հայաստանի էներգետիկայի պատմությունը» քառհատոր գիտական մենագրությունը: 2017թ. Արցախի էներգետիկայի զարգացման բնագավառում ծանրակշիռ ավանդի համար պարգեւատրվել է Արցախի պետական պարգեւով` «Երախտագիտություն» մեդալով: Հաջողությամբ տպագրվում է նաեւ արտասահմանյան հեղինակավոր գիտական պարբերականներում:
StepanPapikyan@yandex.ru
