Աղբյուրը` Ermenihaber.am
Թուրքիան պատժամիջոցներ կկիրառի բոլոր այն քաղաքացիների հանդեպ, ովքեր չեն ենթարկվի կորոնավիրուսի տարածումը կանխարգելելու համար ձեռնարկվող միջոցառումներին եւ սահմանված կարանտինային կանոններին: Հնարավոր է` այդ քաղաքացիները դատապարտվեն 2 ամսից մինչեւ 1 տարի ազատազրկման:
Ermenihaber.com-ը գրում է, որ եթե արտասահմանից եւ այդ թվում Սաուդյան Արաբիա կատարած ուխտագնացությունից (ումրա-փոքր հաջ, ուխտագնացությունՙ մուսուլմանների համար) վերադարձած Թուրքիայի քաղաքացիները չենթարկվեն սահմանված կանոններին, ապա կարող են դատապարտվել Քրեական օրենսգրքի 195)րդ հոդվածով: Կորոնավիրուսի մասով ստեղծվող խուճապը կանխելու համար օրերս Թուրքիայում Զեքերյա Աթաք անունով քաղաքացին ձերբակալվել է Մարաշում կորոնավիրուսի դեպք գրանցվելու մասին իրականությանը չհամապատասխանող գրառում անելու համար:
Նշվում է, որ Աթաքը մարտի 16-ին, Facebook սոցցանցի իր էջում գրել էր, որ Քահրամանմարաշ (Մարաշ) քաղաքի պետական հիվանդանոցում կորոնավիրուսի կասկածով զննվող 2 հիվանդի թեստերը դրական են եղել:
Աթաքի նկատմամբ դատախազությունում գործ է հարուցվել ժողովրդի մեջ վախ ու խուճապ տարածելու համար: Նշվում է, որ ցուցմունք տալուց հետո նա ազատ է արձակվել:
Ոստիկանությունից դուրս գալուց հետո լրագրողների հետ ժպտալով զրուցած Աթաքն ասել է. «Ասել եմՙ 2 հատ կորոնավիրուս է հայտնաբերվել, մի՞թե դա հանցանք է»:
