Կառավարության վերջին չորս վարկային պայմանագրերը, որոնք միասին կազմում են շուրջ 130 միլիոն եվրո, պետք է ծառայեին 2019թ.։ Հետաքրքրական էՙ հիմա ո՞ւր կամ ո՞ւմ են գնալու կամ մնալու այդ գումարները, այն դեպքում, երբ պայմանագրի կնքման պահին տարվա ավարտին մնացել է 18 օր, առավել եւսՙ երբ վարկառուն չի կարողանում հիմնավորել վարկառության նպատակը։ Ի դեպ, վարկային պայմանագիրը կնքել է այն քաղաքական ուժը, որի ղեկավարը մշտապես դեմ է եղել պետական պարտքի գոյացմանը։
Այս մասին իրենց մտահոգություններով ու քննադատություններով Ազգային ժողովում հանդես եկան ԲՀԿ խմբակցության գրեթե բոլոր անդամները։ ԼՀԿ-ն էլ, իր հերթին, ձեռնպահ քվեարկելով, միաժամանակ կասկած հայտնեց, թե ինչի վրա են ծախսվելու այդ գումարները։ Խմբակցության անդամ Գեւորգ Գորգիսյանն, ամենաքիչը, անհիմն համարեց դա։
