ԳԴՀ ԱՐՏԱՔՍՈՒՄ Է… ՆԱԵՎ ՎՐԱՑԻՆԵՐԻՆ

ԱՆԱՀԻՏ ՀՈՎՍԵՓՅԱՆ, Գերմանիա

Երեկՙ հուլիսի 4-ին չարտերային թռիչքով Լայպցիգ-Հալլեի օդանավակայանից Վիեննա, այնտեղից էլՙ Թիֆլիս եւ Երեւան է արտաքսվել ԳԴՀ Սաքսոնիա երկրամասից 27 վրացի, ծանուցում է գերմանական MDR-ըՙ հղում անելով ներքին գործերի նախարարության հայտարարությանը, ըստ որի մինչեւ հուլիս 167 վրացի վերադարձվել է հայրենի Վրաստան:Պատճառաբանությունը մեկն էՙ նրանք բոլորը ԳԴՀ-ում ենՙ չունենալով երկրում գտնվելու օրինական հիմք, իրավունք: Սա ընդգծում ենք հատկապես մի շեշտադրմամբ. Վերջին շրջանում հայաստանյան մեր գործընկերներն իրենց ռեպորտաժներում իրազեկում են Գերմանիայից Հայաստան վերադարձվող մեր հայրենակիցների մեծ թվաքանակի մասինՙ հանրության մի մասի մեջ անհիմն այն կասկածը խորացնելով, թե Գերմանիան Հայաստանի ու հայերի հանդեպ ընդգծված անհանդուրժող վերաբերմունք ունի: ԳԴՀ իշխանություններն անհանդուրժող են, երբ օրինականության սահմանն է ոտնահարվում: