«Ութ հարյուր տարի առաջ վախճանվեց հայոց պատմության եւ մշակույթի բնագավառներում անջնջելի հետք թողած (այլ պետությունների հետ հարաբերությունների զարգացման առումով) Կիլիկիայի թագավոր Լեւոն Ա-ն, որ երրորդ խաչակրաց արշավանքի ժամանակ ցուցաբերած աջակցության համար թագ էր ստացել Ֆրիդրիխի հաջորդիցՙ գերմանացի կայսր Հենրի Դ-ից: Նա թագադրվել էր 1199-ի հունվարի 6-ին Տարսոսի Մայր տաճարումՙ Ռուբինյան, Հեթումյան տոհմերի եւ խաչակրաց ազնվականների ներկայությամբ: Գերմանական Հալլե քաղաքը մայիսի 17-ին եւ 18-ին նշեց այս տարելիցը մի շարք հանդիսություններով, որոնց մաս էր կազմում նաեւ Գերմանիայի եւ Հայաստանի միջեւ մշակութային համաձայնության ստորագրման 20-ամյակը: Նախ բացվեց ցուցահանդես Մորիցբուրգ պետական թանգարանում, որը շարունակվելու է բաց մնալ մինչեւ հուլիսի 29-ը, եւ հաջորդ օրը կազմակերպվեց միջազգային գիտական խորհրդակցություն Մարտին Լութեր համալսարանում», «Միրոր-Սփեքթեյթր» շաբաթաթերթում տեղեկացնում է Մուրիել Միրաք-Վայսբախը :
Խորհդակցությանը մասնակցել են ականավոր գիտնականներ Հայաստանից, Միացյալ Նահանգներից եւ Ֆրանսիայից: Ողջույնի խոսքերով հանդես են եկել Լեոպոլդինայի գիտությունների ազգային ակադեմիայի փոխնախագահ պրոֆ. Գունար Բերգը , Արեւելյան ուսումնասիրությունների ինստիտուտի պրոֆ. Կոռնելիա Հոռնը եւ Հայաստանի դեսպան Աշոտ Սմբատյանը : Ուղերձ է հղել նաեւ Մեծի Տանն Կիլիկիայի կաթողիկոս Արամ Ա -ն:
