Օրերս ՀԲԸՄիության Երեւանի գրասենյակից շնորհակալությամբ ստացանք «Մեթր Հրաչեայ Սեդրակեան. Մարդն ու գործը» գեղատիպ հատորը, որը լույս է տեսել Բեյրութում, 2018 թ.ին, ՀԲԸՄիության հրատարակությամբ, մեկենասությամբ տեր եւ տիկին Պերճ Սեդրակյանների: 387 թվագրյալ էջերով հատորի կազմողն ու խմբագիրը լիբանանահայ հայտնի խմբագիր եւ հրապարակագիր Պարույր Հ. Աղբաշյանն է, որը Ռամկավար Ազատական կուսակցության ու ՀԲԸմիության Հայ երիտասարդաց ընկերակցության կարկառուն ղեկավարի եւ ընդհանրապես լիբանանահայ համայնքի հասարակական հայտնի գործչի կյանքին ու գործունեությանը անդրադարձող առաջաբանի կողքին ներկայացրել է Հրաչյա Սեդրակյանի նկարագիրը, կերպարը, կատարած գործերը: Շնորհակալ աշխատանքով Պ. Աղբաշյանը հատորում ի մի է բերել Հ. Սեդրակյանի բազմաթիվ հոդվածները, որոնք 40-ական թթ.ից մինչեւ 1997 թ.ը, մինչեւ մահվան տարին, լույս են տեսել հատկապես «Զարթօնք» օրաթերթում եւ «Խօսնակ» ամսագրում, ազգային-քաղաքական բովանդակությամբ:
Առաջիկայում առավել հանգամանալիցՙ «Ազգ»ը կանդրադանա նորընծա հատորին:
