Ա.Ք.
Մարտի 31-ին Ուկրաինայում անցկացվեցին նախագահական ընտրություններ. էլեկտրոնային արձանագրությունների 98,03 տոկոսի մշակման արդյունքներով ընտրարշավի առաջատարը մնում է շոումեն Վլադիմիր Զելենսկին, որը ստացել է բոլոր քվեների 30,24 տոկոսը: Երկրորդ տեղում գործող նախագահ Պետրո Պորոշենկոն է (15,93%): Երրորդ տեղում «Հայրենիք» խորհրդարանական խմբակցության առաջնոդ Յուլիա Տիմոշենկոն էՙ 13,39%: Չորրորդ տեղը զբաղեցնում է «Հանուն կյանքի ընդդիմադիր պլատֆորմի» հիմնադիր Յուրի Բոյկոն, որը ստացել է քվեների 11,66 տոկոսը: Այսպիսով, Տիմոշենկոն վերջնականապես կորցրել է նախագահական ընտրությունների երկրորդ փուլ անցնելու հնարավորությունը:
Տիմոշենկոն գտնում է, որ ո՛չ Պորոշենկոն, ո՛չ էլ Զելենսկին չեն կարող հաղթահարել իրենց եւ Ուկրաինայի առջեւ ծառացած մարտահրավերները, այդ մասին նա ապրիլի 2-ին հայտարարել է Կիեւում կայացած ճեպասուլիսում: Նա հրաժարվել է իր ընտրողներին կոչ անել նախագահական ընտրությունների երկրորդ փուլում թեկնածուներից որեւէ մեկի օգտին: Միեւնույն ժամանակ, Տիմոշենկոն ընդգծել է, որ ընտրությունների երկրորդ փուլում ինքը եւ իր թիմը ամեն ինչ կանեն, որպեսզի ոչ ոք չկարողանա կեղծել դրանց արդյունքները: Նախագահական ընտրությունների երկրորդ փուլը տեղի կունենա ապրիլի 21-ին:
