Իսպանիայի մի շարք քաղաքներից ամենակազմակերպված հայկական համայնքը գտնվում է Բարսելոնայում: Հայերի մեծամասնությունը այնտեղ հաստատվել է Մերձավոր Արեւելքից եւ նախկին խորհրդային հանրապետություններից, մասնավորապես Հայաստանից: Ըստ «Բարսելոնայի հայերի մշակութային ասոցիացիայի» (ԲՀՄԱ) նախագահ Տաթեւ Սուլյանի , այնտեղ ապրում են մոտ 3000 հայեր, որոնցից ամենավաղ ժամանողները եթե զբաղվել են շինարարական եւ ռեստորանային աշխատանքներով, ապա ավելի ուշ ժամանողների մեջ կան գործարարներ, իրավաբաններ եւ այլ մասնագիտության տեր անձինք:
2004-ին հիմնված ԲՀՄԱ-ն ունի «Հայ տուն» անվամբ մի հավաքատեղի, որը 2010-ին է հիմնադրվել ՀԲԸՄ-ի աջակցությամբ եւ ծավալում է աշխույժ հայրենասիրական գործունեություն: Ամեն շաբաթ օր, «Միրոր-Սփեքթեյթրում» Արամ Արքունի հաղորդմամբ, համայնքի անդամները հավաքվում են այնտեղ իրար հետ ժամանակ անցկացնելու, շախմատի, պարի եւ հայոց լեզվի դասընթացներին մասնակցելու համար: Ուսուցիչները կամավոր սկզբունքներով են աշխատում, իսկ դասագրքեր ստանում են Հայաստանից: Կազմակերպվում են նաեւ դասախոսություններ եւ այլ միջոցառումներ, ինչպես օրինակ ղարաբաղյան շարժման 30-ամյակին եւ մայրենի լեզվին նվիրված տոնակատարությունները:
ԲՀՄԱ-ն հատուկ ուշադրություն է դարձնում նոր սերնդի հայեցի դաստիարակության խնդիրներին: Ստեղծել է իր կայքը (www.acab.es) եւ ֆեյսբուքյան էջըՙ կարողանալ կապ հաստատելու համար համայնքի անդամների հետ:
