Մայիսի 8-ին, Ամենայն Հայոց կաթողիկոս Գարեգին Բ-ն հաստատել է Հայր Դանիել Ֆինդիքյանի ընտրությունը որպես Հայ եկեղեցու Ամերիկայի արեւելյան թեմի առաջնորդի: Ֆինդիքյանին այդ պաշտոնում մայիսի 4-ին ընտրել էր թեմի 116-րդ համագումարը, որը հավաքվել էր Նյու Յորքի Վեստչեստեր Կաունտիում:
Հոգեւոր նոր առաջնորդը փոխարինելու է Խաժակ արք. Պարսամյանին, որն ավելի վաղ հայտարարել էր, որ 28 երկար տարիներ (յոթը պաշտոնաշրջան) ծառայելուց հետո հրաժարական էր տալիս իր պաշտոնից:
Նյու Յորքի Սբ. Վարդան մայր եկեղեցում մայիսի 8-ին կեսօրից հետո տեղի է ունեցել գահակալման կարճատեւ արարողություն, որի ընթացքում պաշտոնապես նոր առաջնորդին է փոխանցվել եպիսկոպոսական ասանՙ գավազանը: Արարողությանը մասնակցել է Ամենայն հայոց կաթողիկոսի ներկայացուցիչ Նաթան արք. Հովհաննիսյանը, ով Ս. Էջմիածնից հատուկ այդ առթիվ ժամանել էր Նյու Յորք:
