Ֆրեզնոյի պետական համալսարանի գարնանային կիսամյակի համար վերջերս այցելու դասախոս նշանակված դոկտ. Եկտան Թյուրքյըլմազը (տես «ԱԶԳ-ի» հունվարի 19-ի համարը) սկսելով իր դասախոսությունների շարքը, մարտի 7-ին համալսարանի բիզնես կենտրոնի դահլիճում խոսել է «Հայերը ձայնագրություններում: Երաժշտական հորինումները հայրենիքում (բնօրրանում) եւ Սփյուռքում (1900-1938)» թեմայի շուրջ:
Օսմանյան կայսրությունում եւ սփյուռքի տարբեր անկյուններում թողարկված ձայնասկավառակների օրինակով եւ իրական պատմություններով նա մանրամասնորեն ներկայացրել է երաժշտության հորինման բնագավառում կատարվող ոճային, բովանդակային եւ լեզվական փոփոխությունները, որոնք տեղի են ունեցել տեղանքի, տրավմայի եւ նոր մշակույթների հետ առերեսման հետեւանքում:
Թյուրքյըլմազը դոկտորական է պաշտպանել Դյուք համալսարանի մշակութային մարդաբանություն ֆակուլտետում: Ներկայիս Բեռլինի (Գերմանիա) «Forum Transregionale Studien-ի» գիտաշխատող է եւ աշխատում է իր «Վերաիմաստավորելով ցեղասպանությունը: Բռնությունից տուժածները արեւելյան Անատոլիայում 1913-1915 թթ.» մենագրության վրա:
Վերոնշյալ դասախոսության ավարտին երաժշտական իր գերազանց կատարումներով հանդես է եկել ուդի անզուգական վարպետ, արեւելյան երաժշտության մասնագետ Ռիչարդ Հակոբյանը :
