«Ռեալիզմի եւ առասպելաբանության միջեւ: Հայկական աշխարհի ինքնության նորագույն գործոններն ու հիշողության քաղաքականությունը»: Այս թեմայի շուրջ, ըստ ստացված հաղորդագրության, դոկտ. Հայկ Դեմոյանը մարտի 8-ին դասախոսություն է կարդալու Հայագիտական ուսումնասիրությունների եւ հետազոտությունների ազգային «NAASR» կենտրոնում, կազմակերպությամբ այդ կենտրոնի եւ Գալուստ Գյուլբենկյան հիմնադրամի: Դեմոյանը ԱՄՆ-ում է գտնվում որպես Հարվարդ համալսարանի Ռուսաց եւ եվրասիական ուսումնասիրությունների Դեյվիս կենտրոնի 2017-18 տարեշրջանի Ֆուլբրայթ կրթաթոշակի արժանացած այցելու գիտաշխատողի:
Դասախոսության ընթացքում նա քննարկելու եւ վերլուծելու է հետխորհրդային Հայաստանի եւ սփյուռքահայության ինքնության եւ հիշողության գործոնները, հատուկ ուշադրության արժանացնելով պատմության եւ պատմական հին ու նոր խորհրդանշանների ու հերոսների վերարժեւորման ու թյուրըմբռնողականության հարցերը, հաշվի առնելով, որ հատկապես սփյուռքում տարակարծություններ կան այդ հարցերում:
