Ուինվուդից (Պենսիլվանիա) ստացված հաղորդագրությունը տեղեկացնում է, որ հունվարի 23-ին կյանքից հեռացել է Բեյրութում ծնված եւ 1960-ին Մ. Նահանգներ գաղթած հայտնի վիմագրող Անտուան Բազարբաշյանը:
Նա Ֆիլադելֆիայի հայկական համայնքի եռանդուն եւ նվիրյալ անդամներից էր, կազմակերպել էր հարյուրավոր մշակութային միջոցառումներ: Ժամանակին եղել էր Թեքեյան մշակութային միության (ԹՄՄ) Ֆիլադելֆիայի մասնաճյուղի նախագահը, ԹՄՄ-ի Մ. Նահանգների եւ Կանադայի Կենտրոնական վարչության, ՀԲԸՄ-ի Ֆիլադելֆիայի մասնաճյուղի գործադիր հանձնախմբի, ՌԱԿ-ի Արեւելյան Ամերիկայի եւ Կանադայի շրջանային վարչության գործունյա անդամ, ինչպես նաեւ Սբ. Սահակ-Մեսրոպ առաքելական եկեղեցու ծխական:
Իր նվիրվածության, ձեռքբերումների եւ մատուցած ծառայությունների համար ԹՄՄ-ի Կենտրոնական վարչությունը նրան 2015-ին արժանացրել էր մրցանակի: Հուղարկավորությունը տեղի է ունեցել հունվարի 26-ին:
«Ազգ-ի» խմբագրությունը իր խորին ցավակցություններն է հայտնում հանգուցյալի այրունՙ տիկին Ռոզ Եսայանին, որդիներինՙ Արմենին եւ Վիգենին, ինչպես նաեւ բոլոր սգակիր հարազատներին ու բարեկամներին:
