ԽՍՀՄ առաջին ու վերջին նախագահ Միխայիլ Գորբաչովը իտալական La Republica-ին տված հարցազրույցում կոչով դիմել է ԱՄՆ եւ Ռուսաստանի նախագահներին: Գորբաչովը հորդորել է վերջիններիսՙ աշխարհն ազատել զանգվածային ոչնչացման զենքից, քանի որ այսօր, ըստ Գորբաչովի, աշխարհը կանգնած է մեծ աղետի շեմին. «Չեմ ուզում չափազանցել, բայց միջուկային հակամարտության ռիսկն ահռելի է: Սպառազինման նոր մրցավազքն արդեն իրականություն է ու այն կարող է աշխարհի համար աղետով ավարտվել: ԱՄՆ-ի եւ Ռուսաստանի նախագահները պետք է իրենց ձեռքն առնեն զանգվածային ոչնչացման զենքի վերացման կառավարումը», նշել է ԽՍՀՄ 86-ամյա նախագահըՙ շեշտելով, որ միջուկային պատերազմում հաղթողներ չեն լինում:
Ի դեպ, ճիշտ 30 տարի առաջ, 1987-ի դեկտեմբերին ինքըՙ Գորբաչովը եւ ԱՄՆ նախագահ Ռոնալդ Ռեյգանը ստորագրեցին միջին եւ փոքր շառավղով գործողության հրթիռների վերացման համաձայնագիրը, ինչն էլ համարվում է ԱՄՆ-ԽՍՀՄ (Ռուսաստան) «սառը պատերազմին» վերջ տալու առաջին քայլը:
Նշենք նաեւ, որ օրերս Դոնալդ Թրամփը հաստատեց ԱՄՆ 2018-ի ռազմական բյուջեն, ըստ որի 5 միլիարդ դոլար է հատկացվումՙ «Եվրոպայում ռուսական ագրեսիան զսպելու համար»:
