Ջութակահարուհի Մոնիկա Չամասյանի մենակատարությամբ եւ «Crozet Community Orchestra»ի (CCO) նվագակցությամբ նոյեմբերի 11-ին եւ 12-ին ԱՄՆ-ում առաջին անգամ կատարվել է Առնո Բաբաջանյանի մինչ այժմ կորսված համարվող կոնցերտը: Օրը պատահական է ընտրվել, բայց պարզվել է, որ նոյեմբերի 11-ը 62 տարեկանին կյանքից հեռացած տաղանդավոր կոմպոզիտորի մահվան օրն է:
«Արմինյն Միրոր-Սփեքթեյթրի» հաղորդմամբ այդ օրը Վիլի Մոկացյանին նվիրված այդ կոնցերտը հնչել է Չարլոթցվիլի (Արեւմտ. Վիրջինիա) Օլդերգեյթ եկեղեցում:
Չամասյանը այդ կոնցերտը առաջին անգամ լսել է Հայաստանում 1983-ին Բաբաջանյանի հիշատակի արարողությունների ժամանակ: Ամերիկա տեղափոխվելուց հետո նա հանդիպել է «CCO-ի» դիրիժոր Ֆիլիպ Քլարքին եւ հայտնել այդ մասին: Սկսվել են առանձին պարտիտուրաների փնտրտուքները: Հաջողության չեն հասել, եւ Քլարքն ստիպված որոշել է վերստեղծել դրանք: Երեք տարի է տեւել ամբողջական պարտիտուրները կազմելը: «Չեմ դժգոհում, որովհետեւ այն հնարավորություն տվեց ծանոթանալու այդ հրաշալի ստեղծագործության հետ», նշել է նա:
Չամասյանը նույնպես ոգեւորված նշել է, որ 1960-70-ական թվերին իր ուսուցիչ Վիլի Մոկացյանն ու Բաբաջանյանը շատ մոտիկ ընկերներ են եղել: Վիլին հաճախ է Առնոյին այցելել հիվանդանոցում եւ պատմել, թե ինչպես էր Առնոն հուզվում, որ լքելու է այս աշխարհն առանց ավարտին հասցնելու որոշ ստեղծագործություններ:
