«Յունայդետ նյուս ըվ Ինդիա» լրատվական գործակալության հաղորդմամբ, նոյեմբերի 20-ին սկսված Հնդկաստանի միջազգային 48-րդ կինոփառատոնի ժամանակ «Կարիերայի ընթացքում ձեռք բերած նվաճումների» մրցանակ է շնորհվել կանադահայ անվանի կինոռեժիսոր Ատոմ Էգոյանին: Կինոփառատոնի ընթացքում ցուցադրվել են նրա «Exotica», «The Sweet Hereafter» եւ «Remember» ֆիլմերը:
Եգիպտահայ ծնողների զավակ Էգոյանը իր ուրույն տեղն է զբաղեցնում միջազգային կինոարվեստի զարգացման ասպարեզում: Նրա ֆիլմերը (15 լիամետրաժ, մի քանի կարճամետրաժ եւ հեռուստատեսային) արժանացել են կամ մրցանակների թեկնածության են առաջադրվել ամենատարբեր կինոփառատոններում: Հայոց ցեղասպանության զգայուն թեման շոշափող նրա «Արարատ» ֆիլմը «Մարդու իրավունքների պաշտպանության լավագույն ֆիլմ» է ճանաչվել Հոլիվուդի քաղաքական ֆիլմերի ընկերության կողմից:
