Ադրբեջանի «Ղարաբաղ» ֆուտբոլային ակումբը Եվրոպայի ֆուտբոլի չեմպիոնների լիգայի որակավորման վերջին փուլում, չնայած Դանիայում 1:2 հաշվով պարտվեց «Կոպենհագեն»-ին, բայց իրավունք ստացավ մասնակցելու Չեմպիոնների լիգայի խմբայինՙ հիմնական փուլին: Բաքվում ադրբեջանական ակումբը դանիացիներին հաղթել էր 1:0 ու մրցակցի հարկի տակ խփած գոլի շնորհիվ ադրբեջանական ֆուտբոլն աննախադեպ հաջողություն գրանցեց:
Խմբային փուլում ադրբեջանական թիմը կանցկացնի վեց հանդիպում (երեքականՙ մրցակիցների դաշտում, երեքականՙ տանը): Այսինքն ադրբեջանցիները կխաղան Եվրոպայի առաջնակարգ մարզադաշտերում, բարձրակարգ թիմերի հետ ու նրանց կհյուրընկալեն Ադրբեջանում: Իսկ մե՞նք, մենք եւս կարող ենք ուրախանալ, քանի որ Մոսկվայի «Արարատ» ֆուտբոլային ակումբը Ռուսաստանի գավաթի 1/16 եզրափակիչ է դուրս եկել, 1/32-րդում պայքարից հանելով Կալինինգրադի «Բալթիկա»-ին, որը խաղում է Ռուսաստանի չգիտեմ ո՞ր լիգայում: Բացի այդ, շատ հնարավոր է, որ Ադրբեջանի «Ղարաբաղը» հայտնվի «Մանչեսթեր Յունայթեդ»-ի հետ մի խմբում ու մեր Հենոն տասը գոլ խփի ադրբեջանցիներին: Մենք էլ ազգովին կուրախանանք, թքած, որ ֆուտբոլային Եվրոպային մենքՙ մի հոգի ենք տալիս, իսկ ադրբեջանցիներըՙ մի ողջ թիմ, այն էլՙ «Ղարաբաղ» անունով:
Ի դեպ, ռուս հայտնի մեկնաբան Վասիլի Ուտկինն այս կապակցությամբ ասել է. «Զվարճացնում է կովկասյան ակումբների անվանումները, օրինակՙ «Ղարաբաղ», կամ «Արարատ». նրանք իրենց թիմերին անվանում են հարեւան երկրների տեղանուններով»:
