Գրեմմի մրցանակակիր, վաղամեռիկ Քրիս Կոռնելի «Խոստումը» ֆիլմի համար գրած երաժշտության տեսահոլովակը պաշտոնապես թողարկվել է փախստականների համաշխարհային օրվանՙ հունիսի 20-ին նվիրված միջոցառումների օրը: «Արմինյն Միրոր-Սփեքթեյթրի» հաղորդմամբ, Կոռնելի ցանկությունն է եղել տեսահոլովակը թողարկել հենց այդ օրը: Նա նաեւ ցանկացել է, որ տեսահոլովակի վաճառքից ստացված գումարները փոխանցվեն միջազգային մարդասիրական փրկարար կոմիտեին:
«Քրիսը ոչ միայն լավ ընկեր էր, այլեւ եզակի տաղանդով օժտված մի անձնավորություն, որի կորուստի չափը բառերով անհնար է արտահայտել: Պատիվ էր նրա հետ համագործակցել «Խոստումը» ֆիլմի առիթով: Նրա երգերն ու երաժշտությունը շարունակելու են լույս սփռել մարդու իրավունքների դեմ գործված հանցագործությունների վրա եւ հույսով ոգեշնչել մարդկանց», նշել է այդ առթիվ «Խոստումը» ֆիլմի պրոդյուսեր եւ «Survival Pictures» կինոընկերության համակառավարիչ Էրիկ Իսրայելյանը :
Կոռնելը 2017-ին ընտանիքի հետ շրջագայել էր Հունաստանի փախստականների ճամբարները եւ այնտեղ որոշել հիմնել «Քրիս եւ Վիքի Կոռնելների հիմնադրամը», որպեսզի կարողանա հոգալ փախստական երեխաների առողջական եւ կրթական ծախսերը:
«Այլեւս երբեք» բառերը կորցրել են իրենց իմաստը: Նույն վայրագությունները այսօր էլ շարունակվում են: Մենք պետք է այլ միջոցներ որոնենք ու գտնենք պայքարելու դրանց դեմ», նշել էր Քրիսը մի առիթով:
