ՀԲԸՄիության «Հայ կին» հանձնախումբը եւ նրա երիտասարդական մասնաճյուղը ապրիլի 1-ին Փասադենայի (Կալիֆոռնիա) «Վաչե եւ Թամար Մանուկյան» կենտրոնում անցկացնելու են իրենց տարեկան 11-րդ միջազգային համաժողովը, որը նվիրված է լինելու Հայաստանում եւ սփյուռքում հայկական ընտանիքների դերի եւ նշանակության վրա ազդող փոփոխություններին, տեղեկացնում է այդ առթիվ խմբագրությանը հասցեագրված հաղորդագրությունը:
Համաժողովին մասնակցելու եւ ելույթներ են ունենալու վեց մասնագետ-հետազոտողներ: Երեւանի պետհամալսարանից Միշա Մարգարյանը խոսելու է գյուղական վայրերի ընտանիքների դերի եւ արժեքների մասին, ԱՄՆ-ի արեւմտյան թեմից երիտասարդների օգնության բաժնի տնօրեն Հայր Վազգեն Մովսեսյանը անդրադառնալու է հոգեւոր պատասխանատվության հարցերին: Այնուհետեւ քրիստոնեական եկեղեցիների օգնության հանձնախմբից հոգեւոր հովիվ Դանիել Ալբարյանը կենտրոնանալու է ընտանիքի մշակութային դաստիարակության հարցերի վրա, իսկ Երեւանի պետհամալսարանի սոցիոլոգիայի ֆակուլտետի դեկանի տեղակալ Անահիտ Նորա Սահակյանը սեռով պայմանավորված հղիության ընդհատումներինՙ որպես ընտանեկան բռնության միջոցի վրա:
Ընդմիջումից հետո Լոս Անջելեսի փաստաբանական գրասենյակից Ֆրեդերիկ Մեսրոպին խոսելու է «Ընտանեկան բռնության օրենքները Կալիֆոռնիայում» թեմայի շուրջ, իսկ Ֆրեզնոյի պետհամալսարանի սոցիոլոգիայի ամբիոնի դասախոս Մեթյու Ջենդյանը զեկուցելու է «Ամերիկացի լինելով հանդերձ հայ մնալու» թեմայի շուրջ:
