Ջորջ Վաշինգտոն համալսարանի իրավաբանական ֆակուլտետը եւ Արդարության եւ մարդու իրավունքների հայկական իրավական կենտրոնը փետրվարի 28-ին հրավիրել են ներկայիս Հարվարդ համալսարանի Մերձավոր Արեւելքի ուսումնասիրությունների կենտրոնում հետդոկտորական հետազոտություններ անցկացնող դոկտ. Ումիտ Քուրդին վերոնշյալ ֆակուլտետում դասախոսություն կարդալու թուրքական կառավարության հրապարակած խրթին օրենքների շուրջ, որոնք կանոնավոր հաճախականությամբ զրկում էին հայերին իրենց ունեցվածքից:
«Պետական հովանավորություն վայելող այդ քայլերը անքակտելի մասն են կազմում Հայոց ցեղասպանության: Զրկված լինելով իրենց ունեցվածքից, հայերը փաստորեն կորցնում էին իրենց գոյության իրավունքը», նշել է նա, մատնանշելով նաեւ 1934 թ. թուրք-ամերիկյան պայմանագիրը, որով արգելվում էր ԱՄՆ ապաստանած հայերին վերադառնալ իրենց հայրենիքը: Նա իր դասախոսությունը հիմնել է արխիվային նյութերի վրա:
«Մենք այդ փաստերը օգտագործելու ենք մեր իրավական գործունեությունը շարունակելու ընթացքում», ասել է Հայկական իրավական կենտրոնի գործադիր տնօրեն Քեյթ Նահապետյանը:
Հիշեցնենք, որ դրանից առաջ դոկտ. Ումիտ Քուրդը դասախոսությունների շարք էր կարդացել թուրք անհատ հանցագործների գործունեությանց (Ալի Ջենանի Բեյի, Ահմեդ Ֆաիք Բեյի, եւ այլն) մասին:
Քուրդը իր դոկտորականը պաշտպանել է Քլարք համալսարանում 2016-ին:
Թեման եղել է հայերի ունեցվածքի բռնագրավումները Այնթապում 1915-21 թվերին:
