Նյու Յորքի Կոլումբիա համալսարանի այցելու դասախոս դոկտ. Խաչիկ Մուրադյանը այսօր, մարտի 3-ին, այդ համալսարանի դահլիճում դասախոսություն է կարդալու «Չմեկուսանալով աշխարհից: Հայկական համայնքները Չինաստանում 1880-ից 1950-ական թվերը» թեմայով: Ըստ «Արմինյն Միրոր-Սփեքթեյթր» շաբաթաթերթի, դասախոսությունը, որի հովանավորներն են վերոնշյալ համալսարանի հայկական կենտրոնը եւ Ուեթերհեդ արեւելյան Ասիայի ինստիտուտը, հիմնված է լինելու մասամբ հարցազրույցների եւ մասամբ էլ Չինաստանում, Հայաստանում, Լիբանանում, Եվրոպայում եւ Մ. Նահանգներում կատարված արխիվային նյութերի ուսումնասիրությունների վրա: Գալուստ Գյուլբենկյան հիմնարկության հայկական ուսումնասիրությունների կենտրոնը նպաստել է նրան կատարելու իր հետազոտական աշխատանքները:
Հայտնի է, որ հարյուրավոր հայեր 19-րդ դարի վերջում Չինաստան են մեկնել եւ հաստատվել մասնավորապես Հարբին, Շանհայ եւ Տյանցզին վարչական կենտրոններում նոր հնարավորություններ ձեռք բերելու նպատակով:
«Տվյալ դասախոսությամբ մենք հարստացնելու ենք մեր գիտելիքները այդ հեռավոր երկրի հայկական համայնքների մասին», նշել է այդ առթիվ Կոլումբիա համալսարանի հայկական կենտրոնի վարիչ Մարկ Մոմճյանը:
