Անկարայում սիրիացի ընդդիմադիրները Թուրքիայի եւ Ռուսաստանի հետ քննարկում են Հալեպում ռազմական գործողությունների դադարեցման հարցը: ԱՄՆ-ը չի մասնակցում բանակցություններին, հաղորդում է «Ֆայնենշըլ թայմս» թերթը, վկայակոչելով ընդդիմության աղբյուրներ: Անկարան հանդես է գալիս միջնորդի դերում: Թերթի տվյալներով, բանակցություններին մասնակցում են սիրիական ընդդիմության մեծաթիվ ներկայացուցիչներ: Դա վկայում է, որ նրանք ձգտում են հասնել համաձայնության:
Բանակցություններում առաջխաղացում չի նկատվում: ԱՄՆ-ի բացակայությունը ցույց է տալիս, որ Մերձավոր Արեւելքում փոփոխություններ են կատարվում քաղաքական գործընթացի զարգացման մեջ, եւ սիրիական ուժերը հակված են խոսելու ավելի շատ Մոսկվայի, քան Վաշինգտոնի հետ, նշում է թերթը:
ՌԴ արտգործնախարար Սերգեյ Լավրովը ՌԻԱ գործակալությանը տված հարցազրույցում հաստատել է, որ Մոսկվան բանակցում է սիրիական զինված ընդդիմության հետ: Նա հրաժարվել է բացահայտել բանակցությունների մանրամասնությունները, սակայն հավաստիացրել է, որ դրանք կշարունակվեն:
