Vesti.am
Հոկտեմբերի 13-ին Նիկոլ Աղբալյանի անվան թիվ 19 դպրոցում տեղի է ունեցել «Երգը բարեկամության կամուրջ է» փառատոնի հերթական փուլը, որը կազմակերպում է Ռուսաստանի հայերի միությունը:
Միջոցառմանը ներկա էր նաեւ Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանը, ում աշակերտները դիմավորել են աղուհացով:
– Երեխան, նրա սոցիալական խնդիրները, հայոց դպրոցը մշտապես Արա Աբրահամյանի ուշադրության կենտրոնում են,- իր ելույթում նշել է Երեւանի քաղաքապետարանի աշխատակազմի հանրակրթության վարչության պետ Գայանե Սողոմոնյանը :
Արա Աբրահամյանը, ողջունելով ներկաներին, ընդգծել է, որ ապագան ու հույսը երեխաներն են:
– Մենք, որպես մեծ ճանապարհ անցած մարդիկ, ձեզ պետք է թողնենք այնպիսի ժառանգություն, որպեսզի մեր երկիրը դարձնեք ծաղկուն, հզոր, զարգացած պետություն: Ես հավատացած եմ, որ դա լինելու է: Դուք պետք է ձեզ սիրեք, հարգեք ու վստահ լինեք, որ կարող եք ամեն ինչ անել, որպեսզի հասնեք այն հաջողություններին, որոնց մասին երազում եք,-ասել է նաՙ խոստանալով, որ փառատոնի բոլոր հաղթողները մյուս տարի հուլիսի առաջին շաբաթը կլինեն Մոսկվայումՙ մասնակցելու այնտեղ անցկացվող Ծիրանի տոնին:
Դիմելով երեխաներին, Արա Աբրահամյանն ասել է, որ երեխաների հետ համատեղ Հայաստանը պետք է դարձնել գիտության, մշակույթի կենտրոն: Նա կոչ է արել երեխաներինՙ լավ սովորել:
