Իննսունչորս տարեկանում Վուստերի (Մասաչուսեթս) իր բնակարանում սեպտեմբերի 26-ին վախճանվել է մասնագիտությամբ ատամնաբույժ, բայց հայ համայնքում ակտիվ հասարակական գործիչ եւ հայոց պատմության եւ ամերիկահայությանը վերաբերող գրքերի հեղինակ Հ. Մարտին Տերանյանը: Նա թարգմանել եւ հրատարակության է պատրաստել «Հյուսեյնիկ: Հայկական քաղաքի հիմնադրամը, պատմությունը եւ կործանումը» (1996) խորագրով հատորը, որտեղ ամփոփված են հոր հիշողություններն իր ծննդավայրի մասին: Հեղինակել է «Վուստերը Ամերիկա է: Վուստերի հայկական համայնքի պատմությունը» (1995), «Արեւմտյան ճակատի հրաշք մարդըՙ դոկտ. Վարազդատ Հ. Գազանճյան, պլաստիկ վիրաբուժության ռահվիրան» (2007), «Նախագահ Կալվին Կուլիջը եւ հայ որբերի գորգը» (2013-14), ինչպես նաեւ «Հակոբ Պողիկյանՙ ամերիկահայ մարդասերը» (2015) հատորները:
Ցեղասպանության վերապրողների զավակը լինելով նա երբեք չի կարողացել մոռանալ իր մոր սարսափելի պատմությունները եւ երդվել է լույս սփռել դրանց մասին:
