Բրուքլինի (Նյու Յորք) «Բրիկ Հաուս» պարասրահում ՀԲԸՄ-ի կատարողական արվեստի բաժինը ողջունել է ջազային ստեղծագործությունների տաղանդավոր կատարող Տիգրան Համասյանի «Լոյս ի լուսոյ» ծրագրային համերգը, որի ընթացքում նա ներկայացրել է վոկալի եւ դաշնամուրի համար 5-ից 20-րդ դարերի ընթացքում ստեղծված հոգեւոր երաժշտության իր վերամշակումները: Ձայնային գրաֆիկայի, շարժապատկերման եւ տեսատեղեկության բազմամիջավայր ծրագրում հանդիսատեսները վայելել են պատմական Հայաստանի ճանապարհներով նրա 2000 մղոն երկարությամբ ուխտագնացությունը, որը կինոնկարի են վերածել Ալեքս Իգիդբաշյանն ու Էմիլի Մկրտիչյանը : Համերգի ընթացքում օգտագործվել են Բեռլինի «Օնդե ստուդիայի» հեռարձակման տեխնոլոգիաները, ձայնային եւ պատկերային հնարավորությունները, որոնք պատմական տեղանքը վերածել են կենդանի միջավայրի, հուզական տպավորիչ մթնոլորտ ստեղծելով դահլիճում:
«Ջազի, մետալի, թեքնոյի եւ էլեկտրոյի համասյանական միաձուլումը հայկական ավանդական երաժշտությունը գրավիչ եւ դյուրընկալելի էր դարձրել հայ թե օտար հատկապես երիտասարդ ունկնդիրների համար, որոնք երկարատեւ ծափահարություններով գնահատեցին կատարումները», նշել է այդ առթիվ ՀԲԸՄ-ի կատարողական արվեստի բաժնի տնօրեն Հայկ Արսենյանը :
