ՎիվաՍել-ՄՏՍ-ը խրախուսում է ինժեներական մտածողության զարգացումը դպրոցականների շրջանում: Հանրապետության տարբեր դպրոցների ռոբոտաշինական խմբակներին ինն ամիս առաջ տրամադրված բջջայինները ծառայել են որպես կրթական նյութ: Բնապահպանական այս նախաձեռնության արդյունքում, հեռախոսների դետալները վնասակար թափոն լինելու փոխարենՙ կիրառվել են տեխնիկական առաջադրանքների լուծման նպատակով: Շահագործված բջջայինները երկրորդ կյանք են ստացել շնորհալի պատանիների առաջարկած լուծումների շնորհիվ:
Ուսումնասիրելով հեռախոսների կառուցվածքըՙ Գավառի 2-րդ դպրոցի պատանիները նախընտրել են անսարք դետալները փոխարինել աշխատող մասերով, հնարավոր դարձնել բջջայինների մի մասի հետագա անխափան աշխատանքը եւ նվիրել դրանք, իսկ մյուս դետալները կիրառել տեխնիկական այլ խնդիրներ լուծելու նպատակով:
Մի քանի հեռախոսի մարտկոցներ միմյանց միացնելովՙ Էջմիածնի 2-րդ դպրոցի աշակերտները ստացել են նույն լարման, բայց ավելի մեծ տարողության մարտկոցներ, դրանց տվել USB մուտք եւ ելքՙ ստանալով արտաքինից եւ արեւի էներգիայից լիցքավորվող մարտկոցներ: Առանձին դետալներ կիրառվել են էլեկտրական խարտոցներ, մերսող թեւնոցներ եւ այլ սարքեր ստանալու նպատակով:
Երեւանի 173 դպրոցի խմբակի սաները ձգտել են սեփական փորձով կիսվել «Ֆեյսբուք» սոցիալական ցանցումՙ վստահ լինելով, որ իրենց աշխատանքը կարող է հետաքրքրել շատերին, իսկ ոմանց համար կարեւոր դեր խաղալՙ նախասիրությունից մասնագիտացման անցնելու հարցում: Նրանց ստեղծած էջում տեղադրվող տեսագրություններն ու առաջարկվող լուծումները կարող են կրթական դեր ունենալ հասակակիցների շրջանում եւ մոնիթորինգի գործիք ծառայել ծնողների համար:
Պատանիների նախաձեռնությունը չի սահմանափակվում թվարկված աշխատանքներով: Լինելով հեռահաղորդակցության առաջատար օպերատորՙ ՎիվաՍել-ՄՏՍ-ը կարեւոր է համարում երիտասարդների շրջանում բջջայիններից օգտվելու եւ դրանցից առավել խելացիՙ բնապահպանական ճանապարհով ձերբազատվելու իրազեկվածության բարձրացումը:
