ՀԱԿՈԲ ՄՈՒԹԱՖՅԱՆ
Հայկական էկզոտիկաՙ սիրո բռնկումներով
Զարմանահրաշ երեւույթներ են տեղի ունենում հակասական տրամադրություններով համակված մեր Հայաստան աշխարհում: Ո՛չ, ո՛չ, խոսքը չի վերաբերում շփման գծի առաջացրած հեղաբեկումներին: Խոսքը վերաբերում է հայ-ամերիկյան առնչությունների զգացմունքային նուրբ ոլորտներից մեկին:
Բանն այն է, որ արմատներով բայազետցիՙ նախկին սիրիահայ, ներկայումս լոսանջելեսաբնակ տեր եւ տիկին Արմեն Բաթմանյանի ու Օվսաննա Սաղրյանի դուստր Մերին ինտերնետային կապ էր հաստատել Հայաստանի ստեպղինի ոչ պաշտոնական հայրենիք Արամուս գյուղի բնակիչներ տեր եւ տիկին Գառնիկ Հակոբյանի ու Աստղիկ Սարկավագյանի որդի Հարությունի հետ: Եվ պարզվեց, որ այդ ընդամենը էլեկտրոնային շփումները եւս կարող են վերածվել փոխադարձ սիրո եւ ամուսնական դաշինք կնքելու անկասելի ցանկության: Մնում էր միայն առերես հանդիպմամբ հաստատել զգացմունքների անշեղությունը:
Ահա եւ օրերս Երեւան ժամանեց Բաթմանյանների ընտանիքը եւ տեղի ունեցավ իրար հավակնող զույգի անձնական առումով պատմական հանդիպումը: Իրապես հաստատվեց բուռն սիրո առկայությունը: Սակայն ամենամեծ անակնկալը առջեւում էր. ի հայտ եկավ, որ երկու կողմերի հարյուրից ավելի հարազատների ու բարեկամների մասնակցությամբ տեղի ունեցած նշանդրեքի ժամանակ հարսնացուի եղբայր կալիֆոռնիացի «կովբոյ» Հակոբը հասցրել էր աչք դնել փեսացուի միակ քրոջՙ նրբագեղ Ռիմայի վրա: Ընդ որում, նրա համառությունը ծիլեր էր տվել: Եվ մի շաբաթ հետո Բաթմանյանները սիրահոժար խնդրեցին Ռիմայի ձեռքը: Պատկերացնու՞մ եք հատկապես երկու կողմերի մայրերի շփոթվածությունն ընդամենը երկու շաբաթվա ընթացքում միաժամանակյա զոքանչ-սկեսուր պաշտոնական կարգավիճակ ձեռք բերելու կապակցությամբ: Մնում է միայն սպասել առաջիկա «իսկական» հայկական միացյալ հարսանեկան հանդեսին, Հայաստանում թե Ամերիկայում, թերեւս կարեւոր չէ:
ՇՆՈՐՀԱՎՈՐՈՒՄ ԵՆՔ:
Բնականաբար, «Ազգ» շաբաթաթերթի կոլեկտիվը չէր կարող անտարբեր գտնվել քույրերի ու եղբայրների միջեւ տեղի ունեցած այս էկզոտիկ ազգային իրադարձությունների նկատմամբ ու բարեմաղթությունների ջերմ խոսքեր չասել նորոսիրահարյալներինՙ երջանիկ եղեք, ամուր ընտանիք կազմեք ու հարազատներին եւ հայ մարդկանց ուրախացրեք սիրունիկ բալիկներով:
Նկար 1. Հակոբը եւ Ռիման, Մերին եւ Հարությունը
