ՀՌՈՄԻ ՊԱՊԸ ԿԱՅՑԵԼԻ ՀԱՅԱՍՏԱՆ, ԱՎԵԼԻ ՈՒՇՙ ՆԱԵՎ ՎՐԱՍՏԱՆ, ԱԴՐԲԵՋԱՆ

Անահիտ Հովսեփյան, Գերմանիա

Ապրիլի 9-ին կաթոլիկական լրատվական կայքէջերը, ինչպես նաեւ Վատիկանի ռադիոն հաղորդեցին, որ հաստատվել է Հռոմի պապիՙ Հայաստան այցելության ժամանակահատվածըՙ հունիսի 24-26-ը։ Ինչպես իրազեկել էին “Ազգը” եւ հայաստանյան այլ լրատվամիջոցներ, կաթոլիկ քահանայապետին մեր երկիր այցելելու հրավեր էին արել Ամենայն հայոց կաթողիկոս Գարեգին Բ, ինչպես նաեւ մեր երկրի նախագահը եւ կաթոլիկ եկեղեցին ։ Երեկ վերոնշյալ լուրը տարածած հայաստանյան լրատվամիջոցները չէին ծանուցել սակայն նույն օրը հաստատված մեկ ուրիշ կարեւոր տեղեկությունՙ Հռոմի պապը սեպտեմբերի 30-ից հոկտեմբերի 2-ը լինելու է նաեւ Վրաստանում եւ Ադրբեջանումՙ տեղի ուղղափառ պատրիարքի, պետության ղեկավարների եւ կաթոլիկ եկեղեցու հրավերներին արձագանքելով։ Վատիկանի ռադիոն հիշեցնում է նաեւ, որ ժամանակինՙ խորհրդային երկաթե վարագույրի բացվելուն պես կովկասյան 3 հանրապետություններ այցելել է Հռոմի պապ Հովհաննես Պողոս Երկրորդը։